Aankh ne raat jab ik chaand mukamal dekha

Aankh ne raat jab ik chaand mukamal dekha,
Phir samandar ko bhi hote huye pagal dekha,

Raat bhar der talak ki teri batain khud se,
Raat bhar samne chehra tera pal pal dekha,

Aj yaadon ki ghataa toot ke barsi dil par,
Aaj hum ne bhi barasta hua badal dekha,

Hafizaa cheen liya hum se gham-e-dunya ne,
Aaj hum bhool gaye us ko jisey kal dekha,

Baandh ke dekh li paayel bhi sar-e-bazm tarb,
phir bhi behlaa na kabhi dil ka ajab chhal dekha,

Aik larki thi tabasum! ke bohat hansti thi,
Us ki aankhon se bhi behta hua kaajal dekha..

Tabassum Siddiqui