Na jane phir bhi kyun acha laga ha..

Na jane phir bhi kyun acha laga hai,
Agarchey zakham bhi gehraa laga hai,

Koi bichrra hai jaaney phir kisi se,
Suna hai aaj phir mela laga hai,

Raha haayel hamarey darmeyaan jo,
Mujhe woh faasla acha laga hai,

Main kyun na saadgi se us ko keh doon,
Mujhe woh shakhss kyun pyaara laga hai,

Unhe jiss baat ki parwaah nahin hai,
Mujhe us baat ka dharrka laga hai,

Ghiraa betha hai jo yaaron mein Khawar,
Mujhe woh aadmi tanhaa laga hai..

R N Khawar