Video Shayari

Ranjish.com has lots of Urdu Video Shayari Poetry. Feel free to add your own Video Shayari Shayari here.

Video Shayari Collection

Video Poetry is shayari in video format. Video Shayari is recited by a female or male so that shayari lovers can hear it and watch it being recited. This type of audio shayari which can either be in urdu or in hindi is immensely popular among teenagers who don’t just like reading poetry but prefer listening to poetry in attractive voices.
Video poetry lovers usually like poetry in girls voices so we will try to record our audio and video shayari in female voices. We produce these poetry videos ourself.



Mohabbat rog hai jaanan..

Video Shayari

Mohabbat rog hai jaanan,
Ajab sanjog hai jaanan,
Yeh kesa rog hai jaanan,

Barre boorrhe batate thay,
Kayi qisse sunaate thay,
Magar hum mante kab thay,
Yeh sab kuch jaante kab thay,

Bohat pukhta iraade kis tarah se toot jaate hain,
Humen idraak hi kab tha,
Humen kaamil bharosa tha,
Hamare sath kisi surat bhi aesa ho nahin sakta,
Yeh dil kabu se bekabu kabhi bhi ho nahin sakta,

Magar phir yuun hua jaanan,
Najane kyun hua jaanan,
Jigar ka khoon hua jaanan,

Tere abru ki ik jumbish,
Tere sar ke ishare pr,
Gulaabi muskurahat pr,
Chehra-e-masoomana pr,
Jafaye-e-mehermana pr,
Sadaye-e-dilrubana pr,
Adaye-e-qatilana pr,

Ghayal ho gaye hum bhi,
Barre bebaak phirte thay,
Aur mayal ho gaye hum bhi,
Sakhawat karne aye thay,
Aur sayal ho gaye hum bhi,
Barre boorrhon ki baaton ke,
Qayal ho gaye hum bhi,
Mohabbat rog hai jaanan..



Khule gi us nazar pe chashm-e-tar ahista ahista..

Video Shayari

Khule gi us nazar pe chashm-e-tar ahista ahista,
Kiya jata hai paani main safar ahista ahista,

Koi zanjeer phir wapas wahin par le ke ati hai,
KaThin ho raah to chuTTta hai ghar ahista ahista,

Badal dena hai rasta yah kahin pr beth jana hai,
Ke thakta ja raha hai hamsafar ahista ahista,

Khalish ke sath is dil se na meri jaan nikal jaye,
Khinche teer-e-shanasayi magar ahista ahista,

Havaa se sar-kashi main phool ka apna ziyaan dekha,
So jhukta ja raha hai ab yeh sar ahista ahista..

کھلے گی اس نظر پہ چشم تر آہستہ آہستہ - پروین شاکر



Mohabbat woh kahani hai..

Video Shayari

Mohabbat woh kahani hai,
Jis ki ibtida se hi humen maloom hota hai,
Ke us ki inteha kya hai,
Magar hum phir bhi sunte hain,

Humen maloom hota hai,
Ke kis kirdaar ne kis moRR pr kya chaal chalni hai,
Humen maloom hota hai,
Ke kin rahon pe kis ko surat-e-gard-e-safar ho kar,
Safar ki inteha tak humsafar ke sath rehna hai,

Humen maloom hota hai,
Ke kis kirdaar ko ik roz yeh bhi kehna hai,
Ke koi bewafa hoga to akhir kis liye hoga,
Koi tujh se juda hoga to akhir kis liye hoga,
Humen maloom hota hai,
Ke kis ne aik din kya keh ke kis ko choRR dena hai,
Mohabbat main kiya har aik vada toRR dena hai,
Humen maloom hota hai,

Humen yeh bhi khabar hoti hai ke
Is qissa-e-benaam ke kirdaar kya kya hain,
Haqeeqat ya fareb-e-zindagi,
Aasaar kya kya hain,
Humen maloom hota hai,

Mohabbat ki kahani main,
Woh kya kirdaar hai jo darhaqeeqat hum hi hote hain,
Woh kya kirdaar hai jo darhaqeeqat koi aesa shakhss hota hai,
Jise hum jante to hain magar benaam hota hai,
Humen maloom hota hai,
Ke kis kirdaar ka kya anjaam hona hai,
Mohabbat woh kahani hai,
Ke jis ki ibtidaa se hi humen maloom hota hai,
Ke is ki inteha kya hai,
Magar hum phir bhi sunte hain..



Parakhna mat, parakhne se koi apna nahin rehta..

Video Shayari

Parakhna mat, parakhne se koi apna nahin rehta,
Kisi bhi aayine main dair tak chehra nahin rehta,

Barre logon se milne main hamesha fasle rakhna,
Jahan darya samandar se mila darya nahin rehta,

Hazaron sher mere so gaye kaghaz ki qabron main,
Ajab maan hoon koi bacha mera zinda nahin rehta,

Tumhara shehr to bilkul naye andaz wala hai,
Hamare shehr main bhi ab koi hum sa nahin rehta,

Mohabbat aik khushbuu hai hamesha sath chalti hai,
Koi insan tanhayi main bhi tanha nahin rehta,

Koi baadal haray mausam ka phir ailaan karta hai,
Khizaan ke bagh main jab aik bhi pataa nahin rehta..

پرکھنا مت پرکھنے میں کوئی اپنا نہیں رہتا - بشیر بدر



Beqarari si beqarari hai..

Video Shayari

Beqarari si beqarari hai,
Vasl hai aur firaq taari hai,

Jo guzari na ja saki hum se,
Hum ne woh zindagi guzari hai,

Nighare kya huye ke logon pr,
Apna saaya bhi ab to bhari hai,

Bin tumhare kabhi nahin ayi,
Kya meri neend bhi tumhari hai,

Aap mai kaise aaon main tujh bin,
Saans jo chal rahi hai aari hai,

Us se kahiyo ke dil ki galiyon main,
Raat din teri intezari hai,

Hijr ho ya visaal ho kuch ho,
Hum hain aur us ki yadgari hai,

Ik mehak samt-e-dil se aayi thi,
Main yeh samjha teri sawari hai,

Hadson ka hisab hai apna,
Warna har aan sab ki baari hai,

Khush rahe tu ke zindagi apni,
Umar bhar ki umeed-vaari hai..

بے قراری سی بے قراری ہے - جون ایلیا



Jis ki jhankaar main dil ka araam tha, woh tera naam tha..

Video Shayari

Jis ki jhankaar mein dil ka araam tha, woh tera naam tha,
mere honton pe raqsaaan jo ek naam tha, woh tera naam tha,

Mujh se mansub thi dastaanen keyi ek se ek nayi,
Khubsurat magar jo ek ilzaam tha, woh tera naam tha,

Kese karta kisi aur ki guftagu yaad tha sirf tu,
Mujh ko mere junuun ka jo enaam tha, woh tera naam tha,

Subh se shaam tak jo mere pass thi woh teri aas thi,
Shaam tak jo kuch lab-e-baam tha, woh tera naam tha,

Dost jitne the na-aashnaa ban gaye paarsaa ban gaye,
Jo mere saath ruswa sar-e-aam tha, woh tera naam tha,

Gham ne tareekiyon mein uchaala mujhe maar daala mujhe,
Ek nayi chaandni ka jo pegham tha, woh tera naam tha,

Tere hi dam se hai yeh qateel aaj bhi shayari ka wali,
Uss ki ghazlon mein kal bhi jo ilhaam tha, woh tera naam tha..



Lakh mismaar kiye jayen zamaane wale..

Video Shayari

Lakh mismaar kiye jayen zamaane wale,
Aa hi jaate hain neya sheher basaane wale,

Us ki zad pr woh kabhi khud bhi to aa sakte hain,
Yeh kahan jante hain aag lagane wale,

Ab to sawan bhi barood barasta hai,
Ab woh mausam nahin barish main nahane wale,

Sar se jata hi nahin wada-e-fardaa ka junoon,
Mar gaye adal ki zanjeer hilaane wale,

Hum na kehte thay tujhe, waqt bohat zalim hai,
Kya huye ab woh tere naaz uthane wale,

Saaye main bethi huyi nassal ko maloom nahin,
Dhoop ki nazar huye pairr lagane wale,

Ghar main deewaren hain aur sehn main ankhen hain saleem,
Itne azaad nahin waada nibhaane wale..

لاکھ مسمار کیے جائیں زمانے والے - سلیم کوثر



Bara kathin hai rasta, jo aa sako to sath do..

Video Shayari

Bara kathin hai rasta, jo aa sako to sath do,
Yeh zindagi ka faasla, mita sako to sath do,

Barre fareb khao ge, barre sitam uthao ge,
Yeh umar bhar ka sath hai, nibha sako to sath do,

Jo tum kaho yeh dil to kya jaan bhi fida karoon,
Jo main kahoon bas ik nazar lutaa sako to sath do,

Main ik fareb be-nava, main ik faqeer be-sadaaa,
Meri nazar ki iltijaa jo paa sako to sath do,

Hazaar imtihan yahan, hazaar azmayeshen,
Hazaar dukh, hazaar gham, utha sako to sath do,

Yeh zindagi yahan khushi ghamon ke sath sath hai,
Rula sako to sath do, hansaa sako to sath do..

بڑا کھٹن ہے راستا، جو آسکو تو ساتھ دو - عطا شاد



Farz karo hum ehl-e-wafa hon..

Video Shayari

Farz karo hum ehl-e-wafaa hon, farz karo deewane hon,
Farz karo yeh donon baten jhooti hon, afsane hon,

Farz karo yeh jee ki bipta jee se jorr sunayi ho,
Farz karo abhi aur ho itni aadhi hum ne chupaayi ho,

Farz karo tumhen khush karne ke dhoonde hum ne bahane hon,
Farz kar yeh nain tumhare sachh-much ke mai-khane hon,

Farz karo yeh rog ho jhoota, jhooti peet hamari ho,
Farz karo is peet ke rog main saans bhi hum par bhari ho,

Farz karo yeh jog ba-jog ka hum ne dhong rachaya ho,
Farz karo bas yehi haqeeqat, baqi sab kuch maya ho,

Dekh meri jaan keh gaye baahu kaun dilon ki jaane huu,
Basti basti sehraa sehraa lakhon karen deewane huu,

Jogi bhi jo nagar nagar main maare maare phirte hain,
Kaasa liye bhabuut ramaye sab ke dvare phirte hain,

Shayar bhi jo meethi baani bol ke mann ko harte hain,
Banjare jo unche damon jee ke saude karte hain,

In main sache moti bhi hain, in main kankar pathar bhi,
In main uthle paani bhi hain, in main gehre saagar bhi,

Gori dekh ke aage barrhna sab ka jhoota sacha huu,
Doobne wali doob gayi woh gharra tha jis kacha huu..

فرض کرو ہم اہل وفا ہوں، فرض کرو دیوانے ہوں - ابن انشاؔ



Zindagi aik aziyat hai mujhe..

Video Shayari

Zindagi aik aziyat hai mujhe,
Tujh se milne ki zaroorat hai mujhe,

Dil main har lahza hai sirf ek khayal,
Tujh se kis darja mohabbat hai mujhe,

Teri surat teri zulfen malbuss,
Bas inhi cheezon se raghbat hai mujhe,

Mujh pe ab faash hua raaz-e-hayaat,
Zeest ab teri chahat hai mujhe,

Tez hai waqt ki raftaar bohat,
Aur bohat thori si fursat hai mujhe,

Saans jo beet geya beet geya,
Bas isi baat ki kulfat hai mujhe,

Aah meri hai tabassum tera,
Is liye dard bhi rahat hai mujhe,

Ab nahin dil main mere shauq-e-visaal,
Ab har ik shai se faraghat hai mujhe,

Ab na woh josh-e-tamanna baqi,
Ab na woh ishq ki vehshat hai mujhe,

Ab yunhi umar guzar jaye gi,
Ab yehi baat ghaneemat hai mujhe..

زندگی ایک اذیت ہے مجھے - میراجی


Advertisements

We update our poetry database on daily basis so keep coming back for more Video Shayari.



love shayari romantic shayari sad shayari nazam shayari