Nazam Shayari

Ranjish.com has lots of Urdu Nazam Shayari Poetry. Feel free to add your own Nazam Shayari Shayari here.

Nazam Shayari Collection

Nazam Shayari is longer than usual poetries. Read Nazam Shayari here, we have got lots and lots of Nazam Shayari here. Nazam Poetry is usually said in more than 10 lines.



Mohabbat kya ho akhir tum..

Nazam Shayari

Mohabbat rog hai ya phir haseen raag hai koi,
Kisi jharnay ke paani ka dilkash saaz hai koi,

Mujhe aksar yeh lagta hai mohabbat raaz hai koi,
Samajh se baala ik awaz hai koi,
Phir is raaz se parda uthaane ko,
Sabi ehsas ke dhaaron ko milaya maine,
Aur dheere se mohabbat se bass itna kaha,
Mohabbat kya ho akhir tum,

Mohabbat kya ho akhir tum,
Kisi majnoon ka pagalpan,
Kisi farhaad ka taisha,
Kisi sassi ka sehraa ho,
Kisi punnu ki bechaini,
Kisi sohni ka gharra ho,
Junoon haizi ho tum,
Ya phir junoon haizi ki rahbar ho,
Mohabbat kya ho akhir tum,

Batao na kisi mastaanay ki masti ho,
Kisi sufi ka sajda ho,
Kisi zahid ka taqwa ho,
Kisi bhale ke ghunghruu ho,
Kisi mufti ka fatwa ho,
Koi uljhan ho tum ya koi suljhi hui shay ho,
Mohabbat kya ho akhir tum,

Kisi waris ki heer ho,
Kisi saif ki jheel ho,
Tum kis raste ki rahbar ho,
Be-nishan ho ya phir koi nishan-e-manzil ho,
Mohabbat kya ho akhir tum,

Koi mai-khana ho tum,
Ya kisi mai-khane ka jaam ho,
Koi pathar ki murat ho,
Koi masjid ya mandir ho,
Kisi deewane ka raqs ho,
Ya phir mast dhamaal ho,
Andheri raat main jugnu,
Ya phir subah ka sitaara ho,
Mohabbat kya ho akhir tum,

Kisi ki ankh ka paani ho,
Ya khush-rang kahani ho,
Kisi ki thandi aah ho,
Ya tum koi dilkash hansi ho,
Tapti dhoop main saya,
Ya phir december ki dhoop ho,
Mohabbat ka ho akhir tum,

Bohat socha tab mere dil se sadaa ayi,
Mohabbat dil pe ilhaam ki surat,
Bohat dheere se utarti hai,
Kahin andar panapti hai,
Mohabbat rog hai ya phir haseen raag hai koi,
Kisi jharne ke paani ka dilkash saaz hai koi,
Mohabbat deen hai ya phir tayaag hai koi,
Kisi kache gharre ka raaz hai koi..

Watch Video



Kabhi kabhi behadh ddar lagta hai..

Nazam Shayari

Kabhi kabhi behadh ddar lagta hai
Ke dosti ke sab rupehle rishte
Pyaar ke saare sunehre bandhan
Suukhi tenhiyon ki tarah
Chatakh kar tuut na jayen
Aankhen khulen, band hon dekhen
Lekin baaten karna chorr dain
Haat kaam kare
Ungliyan duniya bhar ke qaaziye likhe
Magar phuul jaise bachon ke
Dagmagaate chote chote pairon ko
Sahara dena bhuul jaayen
Aur suhaani shabnami raaton main
Jab roshniyan gul ho jayen
Taare motiya chameli ki tarah mehken
Preet ki ree nibhaayi na jaye
Dilon main kathorta ghar kar le
Mann ke chanchal sote suukh jayen
Yehi maut hai!!
Us dusri se bohat zeyada buri
Jis par sab aansuu bahate hain
Aarthi uthti hai
Chita sulagti hai
Qabron par phool charhaye jate hain
Charaagh jalte hain
Lekin yeh to tanhayi ke bhayanak maqbare hain
Daayimi qaid hai
Jis ke gol gumbad se
Apni cheekhon ki bhi baz-gasht nahin ati
Kabhi kabhi behadh ddar lagta hai..



Akhri chand din december ke..

Nazam Shayari

Akhri chand din december ke,
Har baras hi giraan guzarte hain,
Khawhishon ke nigaar-khanay se,
Kese kese gumaan guzarte hain,

Raftagaan ke bikharte saayon ki,
Aik mehfil si dil main sajti hai,
Phone ki diary ke safhon se,
Kitne number pukaarte hain mujhe,
Jin se marboot be’nawaa ghanti,
Ab faqat mere dil main bajti hai,

Kis qadar pyare pyare naamon pr,
Reengti bad’numaa lakeeren si,
Meri aankhon main phail jati hain,
Dooriyan daayere banati hain,

Phir december ke aakhri din hain,
Har barass ki tarah se ab ke bhi,
Diary ik sawaal karti hai,
Kya khabar is baras ke akhir tak,
Mere in be’chiraagh safhon se,
Kitne hi naam katt gaye hon ge,

Kitne number bikhar ke raston main,
Gard-e-maazi se att gaye hon ge,
Khaak ki dheriyon ke daman main,
Kitne tufaan simatt gaye hon ge,

Har december main sochta hon main,
Aik din is tarah bhi hona hai,
Rang ko roshni main khona hai,

Apne apne gharon main rakhi hui,
Diary dost dekhte hon ge,
Un ki ankhon ke khaak-daanon main,
Aik sehraa sa phailta ho ga,
Aur kuch benishaan safhon se,
Naam mera bhi katt geya hoga..



Har baar mere samne aati rahi ho tum..

Nazam Shayari

Har baar mere samne aati rahi ho tum,
Har baar tum se mil ke bicharta raha hon main,
Tum kaun ho yeh khud bhi anhin janti ho tum,
Main kaun hoon yeh khud bhi nahin janta hon main,
Tum mujh ko jaan kar hi parri ho azaab main,
Aur iss tarah khud apni saza ban geya hoon main,

Tum jis zameen par ho main us ka khuda nahin,
Pass sar-ba-sar aziyat o aazaar hi raho,
Bezaar ho gayi ho bohat zindagi se tum,
Jab bass main kuch nahin to bezaar hi raho,
Tum ko yahan ke saaya o partau se kya gharazz,
Tum apne haq main beech ki dewaar hi raho,

Main ibtidaa se ishq se be-mehr hi raha,
Tum intihaa-e-ishq ka meyaar hi raho,
Tum khoon thookti ho yeh sun kar khushi huyi,
Iss rang is adaa mai bhi purkaar hi raho,

Main ne yeh kab kaha tha mohabbat main hai nijaat,
Main ne yeh kab kaha tha wafadaar hi raho,
Apni mata-e-naaz lutaa kar mere liye,
Bazar-e-iltifaat main nadaar hi raho,

Jab main tumhen nishaat-e-mohabbat na de saka,
Gham main kabhi sukuun-e-rifaaqat na de saka,
Jab mere sab charaagh-e-tamanna havaa ke hain,
Jab mere saarey khawb kisi bewafaa ke hain,
Phir mujh ko chaahne ka tumhe koi haq nahin,
Tanhaa karaahne ka tumhen koi haq nahin..



Rishte kab toota karte hain..

Nazam Shayari

Tum jitna bhi chaho lekin,
Rishte kab toota karte hain,

Rishte chahe toot bhi jayen,
Toote rishte bhi rishte hain,
Kab koi azaad hua hai,
In rishton ki zanjeeron se,
Rishte kab toota karte hain,
Man main sochi tadbeeron se,

Hum se door to ho jate hain,
Pr kab mitt paate hain rishte,
Jeevan ke sehraa main,
Shadaabi laate hain rishte,

Faasle paida karke aese,
Rote rehna bhi rishte hain,
Sheeshon se aur deewaron se,
Baaten karna bhi rishte hai,

Pal pal aankhon ke saahil se,
Dard ki mojain aa milti hain,
Khoon ke aansuu dil rota hai,
Jab jab bhi kalliyan khilti hain,

Rishton ke dehleez pe jana,
Deewanon ke sar phoote hain,
Tooti hai sanson ki dori,
Lekin rishte kab toote hain,

Tum rishte khone main koshan,
Hum rishte bunne main koshaan,
Apni apni koshish le ker,
Mar jayen ge hum tum dono,
Yunhi zinda reh jayen ge,
Toote phoote rishte saare..



Mujhe ab dar nahin lagta..

Nazam Shayari

Mujhe ab darr nahin lagta
kisi ke door jane se
Taluq toot jane se
Kisi ke maan jaane se
Kisi ke rooth jaane se
Mujhe ab Darr nahin lagta

Kisi ko aazmane se
Kisi ke aazmane se
Kisi ko yaad rakhne se
Kisi ko bhool jaane se
Mujhe ab darr nahin lagta

Kisi ko chorr dene se
Kisi ke chorr jaane se
Shamma ko jalaane se
Shamma ko bhujaane se
Mujhe ab darr nahin lagta

Akele muskuraane se
Kabhi ansuu bahaane se
Na iss saare zamaane se
Haqeeqat se fasaane se
Mujhe ab darr nahin lagta

Kisi ki naa-rsaayi se
Kisi ki paa-rsaayi se
Kisi ki bewafaayi se
Kisi dukh intehaayi se
Mujhe ab darr nahin lagta

Na to iss paar rehne se
Na to uss paar rehne se
Na apni zindgaani se
Na ik din maut aane se
Mujhe ab darr nahin lagta

Watch Video



Kabhi iss tarah se bhi eid kar…

Nazam Shayari

Kabhi iss tarah se bhi eid kar,
Abhi zid na kar dil-e-bekhabar,
Ke pass-e-hujoom sitam-giraan,
Abhi kon tujh se wafaa kare,

Abhi kiss ko fursaten iss qadar,
Ke samaitt kar teri kirchiyaan,
Tere haq main khud se dua kare,
Abhi zid na kare dil-e-bekhabar,
Ke tah-e-ghubaar e gham-e-jahan,
Kahan kho gaye tere chaaragar,
Ke raah-e-hayaat main raayegaan,
Kahan so gaye tere humsafar,
Abhi ghamgusaron ki chott seh,
Abhi kuch na sun abhi kuch na keh,

Abhi zid na kar mere be-nawaa,
Abhi ho sake to sahii mere,
Sabhi khawb raakh main daffan kar,
Abhi ho sake to yeh soch le,
Ke tuluu-e-ashq se paishtar,
Kahin dard hai to huaa kare,
Koi chott hai to khila kare,

Kabhi yun bhi ho ke sar-e-uffaq,
Tere dukh ka chaand dammak uthe,
Koi tees khud se chamak uthe,
Kisi sheher-e-zakhm farosh main,
Koi zakham khud se khareed kar,
Sabhi akss khud se khurachh kabhi,
Kiisi aayine pe na deed kar,
Kabhi yuun bhi jashn-e-turb mana,
Kabhi iss tarah se bhi eid kar…

Watch Video



Sheher ke dukaan-daro tum na jaan paao ge..

Nazam Shayari

sheher ke dukaandaro tum na jaan pao ge

Sheher ke dukaandaro,
Karobaar-e-ulfat main suud kya ziyaan kya hai,
Tum na jaan pao ge,
Dil ke daam kitne hain,
Khawb kitne mehnge hain,
Aur nakd-e-jaan kya hai,
Tum na jaan pao ge,

Koi kese mitla hai,
Phool kese khilta hai,
Ankh kese jhukti hai,
Saans kese rukti hai,

Kese raah nikalti hai,
Kese baat chalti hai,
Shauq ki zubaan kya hai,
Tum na jaan pao ge,

Shehr ke dukaandaro,
Vasl ka sukoon kya hai,
Hijr ka junoon kya hai,
Hussn ka fasoon kya hai,
Ishq ka daroon kya hai,

Tum mareez -e- danaayi,
Masslehat ke shedaayi,
Raah-e-gumrahaan kya hai,
Tum na jaan paao ge,

Shehr ke dukaandaro,
Zakhm kese phhalte hain,
Daagh kese jalte hain,
Dard kese hota hai,
Koi kese rota hai,

Ashq kya hai naalay kya,
Dasht kya hai chhaalay kya,
Aah kya fughaan kya hai,
Tum na jaan pao ge,

Na-muraad dil kese subah shaam karte hain,
Kese zinda rehte hain aur kese marte hain,
Tum ko kab nazar aayi, ghamzadon ki tanhayi,
Zeest be-amaan kya hai,
Tum na jaan pao ge,

Jaanta hoon main tum ko Zauq-e-shayari bhi hai,
Shakhsiyat sajaane main ik yeh maahri bhi hai,
Phir bhi harf chuntey ho,
Sirf lafzz Sunte ho,
In ke darmiyaan kya hai,
Tum na jaan pao ge..

Watch Video



Ussey kehna ke laut aye, Mohabbat awaz deti hai..

Nazam Shayari

Ussey kehna ke laut aye,
Mohabbat awaz deti hai,
Tujhe phir se bulati hai,
Jo tu ne saath dekhe they,
Woh sapne sajaati hai,

Woh phoolon pe ruki shabnam
Tumhari raah takti hai,
Tumhe waapis bulaati hai,

Woh jugnu ab bhi kehte hain,
Teri ankhen jo unse sawaal karti theen,
Ussey jawab dene hain,
Saarey hisaab dene hain,

Kabhi to mujh ko kehne do,
Ke tum bin chaand bhi udaas rehta hai,
Meri ankhon ke woh aansu,
Jo girte hain to awaz dete hain,
Samandar ke kinaare sippiyan jo gungunaati hain,
Tumhe waapis bulaati hain,

Ussey kehna meri palkon pe thehra jo ik moti,
Tumhari raah takta hai,
Woh girne se darta hai,
Woh darta hai mohabbat ke bikharne se,
Woh darta hai palkon se girne se,

Woh ik muskaan jo thehri teri aahat ki chaahat main,
To saans lene se darti hai,
Ussey kehna ke laut aye,
Ke woh muskaan phirti hai,
Kabhi uss dar kabhi iss dar,

Ke tu jo aaye to tere honton pe sajj jaye,
Tere baalon main bikhar jaye,

Magar jo tu nahin aata,
To woh un raston ke saare kaanton ki nokk pe sone lagti hai,
Jahan se tum guzarte they,
Murr ke takte rehte they,
Meri saanson ko milte they,
Ussey kehna ke laut aaye,
Mohabbat awaz deti hai,
Tujhe phir se bulaati hai,
Ke laut aao..

Watch Video



Ab jo dekhen to koi aesi barri baat na thi..

Nazam Shayari

Ab jo dekhen to koi aesi barri baat na thi,
Yeh shab-o-roz, maah-o-saal ka pur-paich safar,
Qadrey asaan bhi ho sakta tha,
Yeh jo har morr pe kuch uljhe huye raste hain,
In main tarteeb ka imkaan bhi ho sakta tha,
Hum zara dheyaan se chalte to woh ghar,
Jis ke baam-o-dar-o-deewar pe veerani hai,
Jiss ki har subah main shaamon ki pareshaani hai,
Uss main hum chain se abaad bhi ho sakte they,

Bakht se amman ki raahen bhi nikal sakti theen,
Waqt se sulaah ka paimaan bhi ho sakta tha,
Ab jo dekhen to bohat saaf nazar aatey hain,
Saarey manzar bhi, pass-e-manzar bhi,
Lekin iss dair khayaali ka silaah kya hoga,

Yeh to sab baad ki baaten hain meri jaan,
Inhe dekhte sochte rehne se bhala kya hoga,
Woh jo hona tha hua, ho bhi chuka,
Waqt ki lohh pe likhi hui har tehreer ke harff,
Khat-e-tanseekh se waaqif hi nahin,
Bakht maktab ke register ki tarah hota hai,
Apne number pe jo labaikk nahin keh paatey,
Unka kuch uzzr nahin, koi bhi fariyaad nahin,

Yeh woh taayer hain jinhe apni nawaah yaad nahin,
Linain kat’ti rahin, lafz badalne ke sabbab,
Koi tehreer musalssal nahin hone paayi,
Haasil-e-umar yehi channd adhoorey haakay,
Koi tasveer mukammal nahin hone paayi,
Ab jo dekhen to koi aesi barri baat na thi…

Watch Video


Advertisements

We update our poetry database on daily basis so keep coming back for more Nazam Shayari.



love shayari romantic shayari sad shayari nazam shayari