Anjum Saleemi

baat reh sakti thi ho sakta tha samjhota bhi
dil kisi baat pe aamaada magar hota bhi

marne wale tu koi rishta to rehne deta
main tujhe yaad bhi karta main tujhe rota bhi

Is se aagay to bas la-makaaan reh geya,
yeh safar bhi mera raayegaan reh geya,

Ho gaye apne jismon se bhi be-neyaaz,
Aur phir bhi koi darmiyaan reh geya,

Raakh poron se jharrti gayi umar ki,
Saans ki naaliyon main dhuaan reh geya,

Ab to raasta bataane pe mamuur hoon,
Be-haddaf teer tha be-kamaaan reh geya,

Jab palat hi chale ho to ae deeda-varo,
Mujh ko bhi dekhna main kahan reh geya,

Mit geya hoon kisi aur ki qabar main,
Mera katbaa kahin be-nishaan reh geya..