Designed Shayari

Kon aye ga yahan koi na aaya hoga,
Mera darwaaza hawaaon ne hilaaya hoga,

Dil-e-nadaan na dharrak ae dil-e-nadaan na dharrak,
Koi khhat leke parrosi ke ghar aya hoga,

Is gulistaan ki yehi reet hai ay shaakh-e-gul,
Tu ne jis phool ko paala woh paraaya hoga,

Dil ki qismat hi main likha tha andhera shayed,
Warna masjid ka diyaa kis ne bhujaaya hoga,

Gul se liptti hui titlee ko giraa kar dekho,
Aandhiyo tum ne darakhton ko giraya hoga,

Khelne ke liye bache nikal aye hon ge,
Chaand ab uss ki gali main utar aaya hoga,

‘kaif’ pardes main mat yaad karo apna makaan,
Ab ke barish ne usay torr giraya hoga..

Khaak thi aur jism-o-jaan kehte rahe,
Channd eeentton ko makaan kehte rahe..

Subaah hoti hai shaam hoti hai,
Umar yuun hi tamaam hoti hai..

Sitaaron se agay jahan aur bhi hain,
Abhi ishq ke imtihaan aur bhi hain,

Tahi zindagi se nahin yeh fazaayen,
Yahan sainkrron kaarwaan aur bhi hain,

Qanaaat na kar aalam-e- rang-o-buu pr,
Chaman aur bhi aashiyaan aur bhi hain,

Agar kho geya ik nasheman to kya gham,
Maqamaat aah-o-faghaan aur bhi hain,

Tu shaaheen hai parvaaz hai kaam tera,
Tere saamne aasmaan aur bhi hain,

Isi roz-o-shab main ulajh kar na reh ja,
Ke tere zamaan-o-makaan aur bhi hain,

Gaye din ke tanhaa tha main anjumann main,
Yahan ab mere raazdaan aur bhi hain..

Be-qaraari si be-qaraari hai,
Vasl hai aur firaaq taari hai,

Jo guzaari na ja saki hum se,
Hum ne woh zindagi guzaari hai,

Nagharey kya huye ke logon pr,
Apna saaya bhi ab to bhaari hai,

Bin tumhare kabhi nahin aayi,
Kya meri neend bhi tumhari hai,

Aap main kaise aaaon main tujh bin,
Saans jo chal rahi hai aari hai,

Uss se kahiyo ke dil ki galiyon main,
Raat din teri intezaari hai,

Hijr ho ya visaal ho kuch ho,
Hum hain aur us ki yadgaari hai,

Ik mehak samt-e-dil se aayi thi,
Main yeh samjhaa teri savaari hai,

Haadson ka hisaab hai apna,
Warna har aaan sab ki baari hai,

Khush rahe tu ke zindagi apni,
Umar bhar ki umeed-vaari hai..

Raasta hai ke katt’ta jaata hai,
Faasla hai ke kamm nahin hota..

Sar main saudaa bhi nahin, dil main tamanna bhi nahin,
Lekin is tarkk-e-mohabbat ka bharossa bhi nahin,

Dil ki ginti na yagaanon main na begaanon main,
Lekin us jalvaa-gah-e-naz se uthta bhi nahin,

Shikwa -e-jaur kare kya koi us shokh se jo,
Saaf qaayel bhi nahin saaf mukartaa bhi nahin,

Meherbaani ko mohabbat nahin kehte aye dost,
Aah ab mujh se teri ranjish -e-bejaa bhi nahin,

Ek muddat se teri yaad bhi aayi nahin humen,
Aur hum bhool gaye hon tujhe aesa bhi nahin,

Yeh bhi sach hai ke mohabbat pe nahin main majboor,
Yeh bhi sach hai ke tera hussn kuch aisa bhi nahin,

Yuun to hungaame uthaate nahin deewaana-e-ishq,
Magar ae dost kuch aison ka thikaana bhi nahin,

Fitrat -e-hussn ko maloom hai tujh ko humdum,
Chaara hi ka hai ba-juzz sabr to hota bhi nahin,

Muuh se hum apne bura to nahin kehte ke firaq,
Hai tera dost magar aadmi achaa bhi nahin..

Shaam se aankh main nami si hai,
Aaj phir aap ki kammi si hai..

Kahin woh aa ke mitta na dain intezaar ka lutf,
Kahin qubool na ho jaaye iltejaa meri..

Na haara hai ishq aur na duniya thaki hai,
Diyaa jal raha hai havaa chal rahi hai,

Sukoon hi sukoon hai khushi hi khushi hai,
Tera gham salaamat mujhe kya kammi hai,

Charaghon ke badle makaan jal rahe hain,
Naya hai zamaana nayi roshni hai,

Aray o jafaaon pe chup rehne walo,
Khamoshi jafaaon ki taayid bhi hai,

Mera rehbar mujh ko gumraah na kar de,
Suna hai ke manzil qareeb aa rahi hai,

Khumar -e- bala-nosh ki to aur tauba,
Tujhe zaahidon ki nazar lag gayi hai..