Ghazal Shayari

tu agar ab bhi sar e baam nahin aye ga
cheekhna mera kisi kaam nahin aye ga

kon karta hai mere dost ayadat aese
tere rone se to araam nahin aye ga

saare darwaze khule choR diye hain maine
jao tum par koi ilzaam nahin aye ga

jagta rehta hoon aur khiRki khuli rehti hai
kya khushi hai ke museebat hi paRi rehti hai

itni deewaren gira kar bhi yehi dekha hai
ek deear meri raah main khaRi rehti hai

bagh main bikhre huye rang bohat zalim hain
baaz goshon main to veerani paRi rehti hai

hijr main vasl ke phal-phool khile rehte hain
shaakh bichRe huye mausam se bhari rehti hai

ek veerana hai jo sheher ko kha jata hai
ek basti hai jo jungle main basi rehti hai

ab woh khush–chehra si khatoon kahan par hogi
fikr si koi mere jee ko lagi rehti hai

hadh se baRhti hui vehshat bhi ajab shai hai wafa
mere chehre pe kisi gham ki hansi rehti hai

mausam-e-girya guzar jata hai maqsood wafa
meri dewaar pe barish ki nami rehti hai

tumhare hijr ka anjam khoobsurat hai
bohat udaas magar shaam khoobsurat hai

phir is ke baad yeh rasta kahan ko jata hai
yeh zindagi to koi gaam khoobsurat hai

tu jis tarah se haseen hai zamane bhar se
usi tarah se tera naam khoobsurat hai

nahin zaroori ke har baat ki wazahat ho
kahin kahin pe yeh ibhaam khoobsurat hai

main is liye deta safayi apni wafa
mere hareef ka ilzaam khoobsurat hai

jal bhi chuke parwane ho bhi chuki ruswayi
ab khaak uRane ko beThe hain tamashayi

ab dil ko kisi karwaT araam nahin milta
ik umar ka rona hai do din ki shanasaayi

ab vusat e aalam bhi kam hai meri wehshat ko
kya mujh ko Daraye gi is dasht ki pehnayi

jee main hai ke is dar se ab hum nahin uthen ge
jis dar pe na jane ki so baar qasam khayi

aaghaaz se acha raha anjaam hamara
logon ko batata nahi woh naam hamara

phir hum se muhabbat ki ataat nahi hogi
ik baar nikal aye agar kaam hamara

bimaar ko bhi chain se sonay nahi deta
is ishq ko bhaata nahi araam hamara

ik din to koi theek nishane pe lage ga
har teer nahi jaye ga nakaam hamara

yuun bhool gaye pehli si parwaz kabutar
lamhon main pohanch jata he paighaam hamara

shohrat ke liye khud ko giraya nahi taskeen
sagar se kabhi chalka nahi jam hamara

is gham ko ikhteyar nahin kar raha hoon main
yeh to nahin ke pyar nahin kar raha hoon main

apni udasiyon ke nashe main hoon aaj kal
shughal e khum o khumaar nahin kar raha hoon main

kuch dair se hai rang e tamasha ruka hua
ik teer dil se paar nahin kar raha hoon main

ab dekhta hoon raah main duniya saji hai
ab tera intezar nahin kar raha hoon main

main aap apna dard jagata hoon raat bhar
kuch tum pe inhisaar nahin kar raha hoon main

le rakh tu apna harf e tasalli bhi paas rakh
yeh koi karobar nahin kar raha hoon main

main zeest kar raha hoon yeh tum ko khabar nahin
tum par to jan nisaar nahin kar raha hoon main

hai dasht yeh bhi hadh e tasavur main is liye
is dasht ko bhi paar nahin kar raha hoon main

kya raaz hai ke jis ko batane se peshtar
apna bhi aitbar nahin kar raha hoon main

yun to rahe ho tum bhi saf-e-dushmana main dost
lekin tumhe shumaar nahin kar raha hoon main

tamam sheher ko hulia bata diya gaya hai
mere faraaar ko mushkil bana diya gaya hai

gharon main bethe huye kamyabi chahte hain
humen duaon ka chaska laga diya gaya hai

gale se lag ke kisi aur ke main sochta hoon
kahan ka joR kahan par laga diya gaya hai

humen talashne walon ka rok kar rasta
hamare baray tajassus baRha diya gaya hai

ginti ke mere yaar hain aur yaar bhi kitne
choTi si kahani ke hon kirdaar bhi kitne

munkir ko wazahat ke takaluf ki zaroorat
thoRe se to inkaar hain inkaar bhi kitne

aese bhi nahin hain ke usay jeet ke lauTen
maana zara hoshyaar hain, hoshyaar bhi kitne

khuda ko logon ke nazdeek lana chahta tha
main apne gaon main masjid banana chahtha tha

kuch is liye bhi meri khudkushi zaroori thi
main aik umar ka jhagRa miTaana chahta tha

main chahta tha woh rotay main muskura uthe
main us ki aankh se misra churana chahta tha

kisi mazaar ki zeenat bana diya gaya hai
main jis charagh ko suraj banana chahta tha

main is liye bhi zara fasle pe theher gaya
woh mujh se mil ke bohat door jana chahta tha

main chahta tha ke woh mujh se dil ki baat kare
main aik ghaar se pathar haTana chahta tha

ab us ki aankh nahin lag rahi kahin aami
jo saray sheher ki neendain uRana chahta tha

charaagh jalne lage to hawaa nahin deta
faqeer hoon main kabhi baddua nahin deta

to kya isi liye duniya nahin tawazun main
woh jurm dekh ke foran sazaa nahin deta

zaroor lutf ka pehlu hai mere jalne main
wagarna uth ke mujhe woh bhujha nahin deta

tu aik bar to kehta ke kash aesa ho
main asmaan zameen se mila nahin deta

yeh kitna waazeh ishara hai bakht Ddhalne ka
main bheek doon to bhikari dua nahin deta

main khaali hath kabhi lauT-ta nahin miqdad
mujhe khushi ke elawa woh kya nahin deta