Ghazal Shayari

Husn-e-maah garche ba-hangaam-e-kamal acha hai,
Us se mera maah-e-khurshid-jamaal acha hai,

Bossa dete nahin aur dil pe hai har lehza nigaah,
Jee main kehte hain ke muft aye to maal acha hai,

Aur bazaar se le aaye agar toot gaya,
Saaghar-e-jaam se mera jaam-e-sifal acha hai,

Be-talab dein to maza us main sivaa milta hai,
Woh gadaa jis ko na ho khuu-e-sawal acha hai,

Un ke dekhe se jo aa jati hai muuh pr raunaq,
Woh samajhte hain ke beemaar ka haal acha hai,

Dekhiye paate hain ushaaq buton se kya faiz,
Ik barhaman ne kaha hai ke yeh saal acha hai,

Qatraa dariyaa main jo mil jaye to dariyaa ho jaye,
Kaam acha hai woh jis ka ke maal acha hai,

Hum ko maaloom hai jannat ki haqeeqat lekin,
Dil ke khush rakhne ko ghalib yeh khayal acha hai..

Koi halat nahin, yeh halat hai,
Yeh to ashob-naak suurat hai,

Anjumann main yeh meri khamoshi,
Burd-baari nahin hai, wehshat hai,

Tujh se yeh gaah-gaah ka shikwa,
Jab talak hai bassaa ghaneemat hai,

Garm-joshi aur is qadar ke kya baat,
Kya tumhen mujh se kuch shikayet hai,

Tu bhi ae shakss kya kare akhir,
Mujh ko sar phorrne ki aadat hai,

Ab nikal aao apne andar se,
Ghar main samaan ki zaroorat hai,

Hum ne jana to hum ne yeh jana,
Jo nahin hai woh khuubsurat hai,

Khawhishen dil ka sath chorr gayin,
Yeh aziyat bari aziyat hai,

Log masroof jante hain mujhe,
Yaan mera gham hi meri fursat hai,

Aaj ka din bhi aish se guzra,
Sar se paa tak badan salamat hai..

Ashiq thay sheher main jo puraane sharaab ke,
Hain un ke dil main vaswasay ab ehtisaab ke,

Woh jo tumhare hath se aa kar nikal geya,
Hum bhi qaatil hain ussi khana-kharab ke,

Phoolon ki saij par zara araam kya kiya,
Us gul-badan pe naqssh uth aaye gulaab ke,

Soye to dil main ek jahan jaagne laga,
Jaage to apni aankh main jaale they khawb ke,

Bas tishnagi ki aankh se dekha karo unhe,
Dariya ravaan-davaan hain chamakte saraab ke,

Kis tarah jamaa kijiye ab apne aap ko,
Kaghaz bikhar rahe hain puraani kitaab ke..

Seena dehak raha ho to kya chup rahe koi,
Kyun cheekh cheekh kar na gala chheel le koi,

Saabit hua sukoon dil-o-jaan kahin nahin,
Rishton main dhoondta hai to dhoonda kare koi,

Tarkk-e-taluqaat koi masla nahin,
Yeh to woh raasta hai ke bas chal parre koi,

Deewar janta tha jise woh dhool thi,
Ab mujh ko aitmaad ki daawat na de koi,

Main khud yeh chahta hoon ke halaat hon kharaab,
Mere khilaaf zeher ugalta phire koi,

Ae shakhss ab to mujh ko sabhi kuch qabool hai,
Yeh bhi qabool hai ke tujhe cheen le koi,

Haan theek hai main apni anaaa ka mareez hoon,
Aakhir mere mizaaj main kyun dakhal de koi,

Ik shakss kar raha hai abhi tak wafaa ka zikr,
Kaash is zabaan-daraaz ka muu noch le koi..

Woh zulm-o-sitam dhaaye aur mujh se wafa mangay,
Jaise koi gul kar ke deepak se ziyaa mangay,

jeena bari naimat hai jeene ka chalan sikhen,
Acha to nahin koi marne ki duaa mangay,

Gham bhi hai udaasi bhi tanhai bhi aansu bhi,
Sab kuch to mayassar hai dil mangay to kya mangay,

Auqaat hai kya us ki woh pesh-e-nazar rakhe,
Insan na koi apne daaman se siva mangay,

Phir chehra-e-qatil ki nazron ko zaroorat hai,
Phir kuucha-e-qatil ki dil aaab-o-havaa mangay..

Is se aagay to bas la-makaaan reh geya,
yeh safar bhi mera raayegaan reh geya,

Ho gaye apne jismon se bhi be-neyaaz,
Aur phir bhi koi darmiyaan reh geya,

Raakh poron se jharrti gayi umar ki,
Saans ki naaliyon main dhuaan reh geya,

Ab to raasta bataane pe mamuur hoon,
Be-haddaf teer tha be-kamaaan reh geya,

Jab palat hi chale ho to ae deeda-varo,
Mujh ko bhi dekhna main kahan reh geya,

Mit geya hoon kisi aur ki qabar main,
Mera katbaa kahin be-nishaan reh geya..

Hum hi main thi na koi baat yaad na tum ko aa sake,
Tum ne humen bhulaa diya hum na tumhe bhulaa sake,

Tum hi na sun sake agar qissa -e- gham sunay ga kon,
Kis ki zabaan khule gi phir hum na agar sunaa sake,

Hosh main aa chuke thay hum josh main aa chuke thay hum,
Bazm ka rang dekh kar sar na magar uthaa sake,

Ronaq-e-bazm ban gaye lab pe hikayaten rahin,
Dil main shikayaten rahin lab na magar hilaa sake,

Shauq-e-visaal hai yahan lab pe sawal hai yahan,
Kisi ki majaal hai yahan hum se nazar mil sake,

Aesa ho koi nama-e-bar baat pe kaan dhar sake,
Sun ke yaqeen kar sake ja ke unhe sunaa sake,

Ajazz se aur barrh gayi barhami mizaj-e-dost,
Ab woh kare ilaaj dost jis ki samajh main aa sake,

Ehl-e-zabaan to hain bohat koi nahin hai ehl-e-dil,
Kon teri tarah hafeez dard ke geet gaa sake..

Do chaar gaam raah ko hamvaar dekhna,
Phir har qadam pe ik nayi deewar dekhna,

Aankhon ki raushni se hai har sang aayina,
Har aayine main khud ko gunaahgaar dekhna,

Har aadmi main hote hain dass bees aadmi,
Jis ko bhi dekhna ho kayi baar dekhna,

Maidaan ki haar jeet to qismat ki baat hai,
Tuuti hai kis ke haath main talvaar dekhna,

Dariyaa ke is kinaare sitaare bhi phool bhi,
Dariyaa charrhaa hua ho to us paar dekhna,

Achi nahin hai sheher ke raston se dosti,
Aangan main phail jaaye na bazaar dekhna..

Zameen uthaaon ga aur asmaan pe rakh don ga,
Jahan ki cheez hai ja ke wahan pe rakh doon ga,

Main ghar ke sath banaon ga aik choti dukan,
Phir apne khawb utha ke dukan pe rakh doon ga,

Mujhe dua pe zara bhi yaqeen nahin hai magar,
Jo tu kahe to diya aastaan pe rakh doon ga,

Yeh aag meri nahin hai jis ki hai utha lo mian,
Main sar-phiraa hoon na-jane kahan pe rakh doon ga..

Musalssal bekali dil ko rahi hai,
Magar jeenay ki surat to rahi hai,

Main kyun phirta hoon tanha maara maara,
Yeh bassti chain se kyun so rahi hai,

Chale dil se umeedon ke musafir,
Yeh nagri aaj khaali ho rahi hai,

Na samjho tum isay shor-e-bahaaran,
Khizaan paton main chup kar ro rahi hai,

Hamare ghar ki deewaron pe nasir,
Udaasi baal kholay so rahi hai..