Agar kabhi tere aazaar se nikalta hoon..

Agar kabhi tere aazaar se nikalta hoon,
To apne daayera-e-kaar se nikalta hoon,

Havaa e taaza hoon rukna nahin kahin bhi mujhe,
Gharon me ghustaa hoon ashjaar se nikalta hoon,

Kabhi hai uss ke mazafaat me numuud meri,
Kabhi main apne hi aasaar se nikalta hoon,

Main ghar me jab nahin hota to ghaas ki surat,
Dareecha o dar-o-dewaar se nikalta hoon,

Issi kinaara e dariyaa-e-zaat pr har dum,
Ghuroob hota hoon uss paar se nikalta hoon,

Vidaa karti hai rozaana zindagi mujh ko,
Main roz maut ke manjhdaar se nikalta hoon,

Rukaa hua koi sailaab hoon tabiyat ka,
Hamesha tundi-e-raftar se nikalta hoon,

Ise bhi kuch meri himmat hi jaaniye jo kabhi,
Khayal o khawb ke ambaar se nikalta hoon,

Libaas bechta hoon ja ke pehle apna “zafar”,
To kuch khareed ke bazaar se nikalta hoon..