Aalam-e-madhahoshi me

Hai duaa yaad magar harf-e-duaa yaad nahi
Mere naGmaat ko andaaz-e-navaa yaad nahi

Mai ne palakon se dar-e-yaar pe dastak dii hai
Mai VO saahil huN jise koi sadaa yaad nahi

Mai ne jin ke liye raahon me bichhayaa tha lahuu
Ham se kahate hain vahii ahad-e-vafaa yaad nahi

Kaise bhar aain sar-e-shaam kisi kii aaNkhen
Kaise tharraa_e charaaGon kii ziyaa yaad nahi

Sirf dhundhalaaii sitaaron kii chamak dekhi hai
Kab huaa kaun huaa kis se Khafaa yaad nahi

Zindagi jabr-e-musalasal kii tarah kaTati hai
Jaane kis jurm kii pai hai sazaa yaad nahi

Aao ik sajdaa karen aalam-e-madhahoshi me
Kahate hain ke “Sagar” ko Khudaa yaad nahi