Designed Shayari

Ranjish.com has lots of Urdu Designed Shayari Poetry. Feel free to add your own Designed Shayari Shayari here.

Designed Shayari Collection

Designed Poetry is a form of poetry which is in the form of picture. This kind of Urdu Designed Poetry is made up in photoshop. This is a pure art, to represent your thoughts in a picture. Designed Poetry is hugely popular in pakistan, people love reading Designed Poetry because its not in text so its not boring to read. This is often called Urdu Picture Poetry.



kar loon ga jama daulat o zar, us ke baad kya

Designed Shayari

kar loon ga jama daulat o zar, us ke baad kya ?
le loon ga shandaar sa ghar, , us ke baad kya ?

mai ki talab jo hogi to ban jaon ga main rind
kar loon ga maikadon ka safar, us ke baad kya ?

hoga jo shauq husn se raaz o niaz ka
kar loon ga gesuyon main sahar, us ke baad kya ?

sher o sukhan ki khoob sajaon ga mehfil-en
duniya main ho ga naam magar, us ke baad kya ?

mauj aye gi to saare jahan ki karoon ga sair
wapis wohi purana nagar, us ke baad kya ?

ik roz maut zeest ka dar khaTkhaTaye gi
bujh jaye ga charagh e qamar, us ke baad kya ?

uthi thi khaak, khaak se mil jaye gi wahin
phir us ke baad kis ko khabar, us ke baad kya ?



paiRr jo ba-samar nahin hota

Designed Shayari

paiRr jo ba-samar nahin hota
woh kabhi moatbar nahin hota

dil se jab tak nahin nikalti hai
baat main kuch asar nahin hota

mujh ko manzil kabhi nahin milti
tu agar humsafar nahin hota

aik dar se jo lau lagata hai
woh kabhi darbadar nahin hota

zakham sab ko bhala dikhayen kyun
har koi charagar nahin hota

main kiran bas khuda se Ddarti hoon
mujh ko logon ka Ddar nahin hota



har dukh mujhe qabool magar yeh sitam na ho

Designed Shayari

har dukh mujhe qabool magar yeh sitam na ho
ya rab bichaRr-te waqt bhi woh aankh num na ho

yeh kya ke saari raat kaTe jagte huye
aur phir bas aik sher ho us main bhi dum na ho

yeh kya ke aik dar se bandhe hon tamaam umar
yeh kya ke aik baar bhi nazar -e- karam na ho

yah kya ke sab se daad ke talib ho shayaro
yaani ke woh bhi roye ke jise koi gham na ho

ae kash ke apni jang chiRre us badan ke sath
aur dono samt aman ka koi alam na ho

sansain ukhaRr ukhaRr kar chalen par chalen zaroor
hum main agar judai ho to kabhi aik dum na ho



agarche main ik chaTaan sa admi raha hoon

Designed Shayari

agarche main ik chaTaan sa admi raha hoon
magar tere baad hausla hai ke jee raha hoon

woh raiza raiza mere badan main utar raha hoon
main qatra qatra usi ki ankhon ko pee raha hoon

teri hatheli pe kis ne likha hai qatal mera
mujhe to lagta hai main tera dost bhi raha hoon

khuli hain ankhen magar badan hai tamaam pathar
koi bataye main mar chuka hoon ke jee raha hoon

kahan mile gi misaal meri sitamgari ki
ke main gulab-on ke zakham kanTon se see raha hoon

na puch mujh se ke sheher walon ka haal kya tha
ke main to khud apne ghar main bhi do ghaRi raha hoon

mila to beete dinon ka sach us ki ankhon main tha
woh ashnaa jis se muddaton ajnabi raha hoon

bhula de mujh ko ke bewafayi bajaa hai lekin
ganwaa na mujh ko ke main teri zindagi raha hoon

woh ajnabi ban ke bhi ab mile to kya hai mohsin
yeh naaz kam hai ke main bhi us ka kabhi raha hoon



abhi to zinda hain kehte ho yara kya hoga

Designed Shayari

abhi to zinda hain kehte ho yara kya hoga
hamare baad najane tumhara kya hoga

hamara khud pe guzara nahin hai muddat se
hamare sath kisi ka guzara kya hoga

yeh dekhne ke liye kyun na aik din mar jayen
hamare sath usi din dobara kya hoga

woh jis ke nisf ne pagal kiya hai duniya ko
main sochta hoon haqeeqat main sara kya hoga

hamare naqsh -e- qadam se qadam milao magar
hamara kuch na bana to tumhara kya hoga

zaban lipTi hui hai gale se murde ki
sawal yeh nahin kaise, pukara kya hoga

woh mil ke jaye to lagta nahin mila hai kabhi
agar kinara kare to kinara kya hoga

pehen liya hai usse ankh moond kar maine
wagarna sochta rehta utara kya hoga

na us ko milne main dilchaspi hai na mujh ko magar
hum intezar main hai istikhara kya hoga

jinhe pata tha sabhi kuch woh log bhi na rahe
humen pata hi nahin kuch hamara kya hoga



saari khushi-yan mila ke dekhi hain

Designed Shayari

saari khushi-yan mila ke dekhi hain
tere jane ka gham zeyada hai



main apne sath bitati hoon roz sham ka waqt

Designed Shayari

main apne sath bitati hoon roz sham ka waqt
ke waqt -e- assr hai khud se mere kalaam ka waqt

tamam din jahan chaho raho khuda ke liye
kisi ke naam na karna hamare naam ka waqt

allam baghawat-on ka kar liya buland magar
kaTte ga dekhna zindaan main ghulaam ka waqt

bas us ke baad to bachte hain sirf pachtawe
yahi hai dost raunat ki rok thaam ka waqt

khuda kare ke main kar doon maaf dil se usse
khuda na laye kabhi mujh pe intiqaam ka waqt

hamare rizq ka daromadar hum par hai
ke thora ishq ka rakha hai, baaqi kaam ka waqt



Apni har baat zamane se chupaani paRri thi..

Designed Shayari

apni har baat zamane se chupaani paRri thi,
phir bhi jis ankh main dekha to kahani paRri thi,

main ne kuch rang churaye thay kisi titlee ke,
aur phir umar hifazat main bitani paRri thi,

kal kisi ishq ke beemar pe dumm karna tha,
peer-e-kamil ko ghazal meri sunani paRri thi,

kucha-e-ishq se nakam palaTtne wale,
tu ne dekha tha wahan meri jawani paRri thi,

dil na seh paya kisi aur se qurbat us ki,
mujh ko deewar se tasveer haTtani paRri thi,

main bohat jald buRrhape main chala aaya tha,
bin tere umar ki raftar baRrhani paRri thi,

us ki hasrat ka badan barf na ho jaye kahin,
apne seene main mujhe aag lagani paRri thi,

tere mumtaz ko gham maut ka sirf is liye hai,
apne baalon main tujhe khaak rawani paRri thi..



Yeh vasl kya ke khuda toor hi jalaa de yaar..

Designed Shayari

Yeh vasl kya ke khuda toor hi jalaa de yaar,
Maza to jab hai ke woh arsh par jagah de yaar,

Main roz khawb main oonchi jagah se girta hoon,
Tu mujh ko choRrne wala hai to bata de yaar,

Yeh hijr-o-vasl ke qisse to sab ne likhe hain,
Tu sher baandh raha hai to kuch naya de yaar,

Tu mere baad unhe phir bula le mehfil main,
Bas aik baar mere samne utha de yaar,

Woh mera ho nahin sakta to ae musawwar sun,
Hamari sath main tasveer hi bana de yaar..



Jahan par dosti ho us jagah anaayen kya..

Designed Shayari

Jahan par dosti ho us jagah anaayen kya,
Kahe agar tere pairon main beth jayen kya,

Jo naao paar gayi laut kar nahin aati,
Jo shakhss doob gaya hai usse bachayen kya,

Kisi ki yaad main jaagen sitare dekhen hum,
Sulag raha hai jo cigarette usse bhujayen kya,

Tumhare baad koi zakham kyun karen taaza,
Guzar chuka hai jo us par lahuu bahayen kya,

Kisi ki neend meri neend kese ho jaye,
Kisi ke khawb meri ankh main samayen kya..


Advertisements

We update our poetry database on daily basis so keep coming back for more Designed Shayari.



love shayari romantic shayari sad shayari nazam shayari