thak ke bethoon to mujhe rasta nazar aye ga

thak ke bethoon to mujhe rasta nazar aye ga
shaam is dasht main guzre gi to ghar aye ga

soch kar meri mohabbat main qadam rakhna tum
is se aage to bohat lamba safar aye ga

muntazir aankhen kisi taaq main bujh jayen gi
koi ho ga hi nahin koi agar aye ga

seekh jaaon ga tere baad bhi jeena lekin
mujh ko ae dost tere hijr se Dar aye ga

mujh tak aate huye duniya usay roke gi bohat
ruk bhi jaye ga kisi raah main par aye ga

umar ke din to isi aas main kaT jaate hain
raat Dhal jaye gi aur waqt e sahar aye ga

waqt ki qaid se azaad maah o saal se duur
ik zamana hai ke jo baar-e-digar aye ga