Ghazal Shayari

Ranjish.com has lots of Urdu Ghazal Shayari Poetry. Feel free to add your own Ghazal Shayari Shayari here.

Ghazal Shayari Collection

Ghazal Poetry is a form or poetry which is little longer than other forms of poetry and contains more words.. Urdu Ghazal Shayari and Ghazal Poetry are the keywords this shayari is searched with.Ghazal Poetry is mostly written in 6 to 10 lines.



Jism ke is khandDar ki tanhai..

Ghazal Shayari

Jism ke is khandDar ki tanhai,
Aur yeh raat bhar ki tanhai,

Aik tasveer bhi nahin ghar main,
Uff yeh deewar-o-dar ki tanhai,

Koi aahatT na koi saaya hai,
Har qadam hai safar ki tanhai,

Aik aalam ki hai sametTe huye,
Meri fikr-o-nazar ki tanhai,

Meri sanson main bass gayi jaise,
Jan-o-dil ki jigar ki tanhai,

Dekhta hai suraj nikal ke roz,
Yeh mere baam-o-dar ki tanhai,

Raat din rote hain dar-o-deewar,
Kha gayi mujh ko ghar ki tanhai,

Zindagi ke safar main ae arpit,
Dekh li darbadar ki tanhai..



Gham ko inam-e-wafa bhi to nahin keh sakte..

Ghazal Shayari

Gham ko inam-e-wafa bhi to nahin keh sakte,
Hum mohabbat ko khataa bhi to nahin keh sakte,

Yehi keh dete hain ab tujh se bichaRr kar khush hain,
Aur kuch is ke siwa bhi to nahin keh sakte,

Sari duniya main jo ik shakhss chuna tha, tu tha,
Ab tujhe khud hi bura bhi to nahin keh sakte..



Teergi main subh ki tanveer ban jayen ge hum..

Ghazal Shayari

Teergi main subh ki tanveer ban jayen ge hum,
Khawb tum dekho ge aur tabeer ban jayen ge hum,

Ab ke yeh socha hai gar azaad tum ne kar diya,
Khud hi apne paaon ki zanjeer ban jayen ge hum,

Aansuon se likh rahe hain bebasi ki dastan,
Lag raha hai dard ki tasveer ban jayen ge hum,

Likh na paye jo kisi ki neem-baaz ankhon ka raaz,
Woh yeh vaada kar rahe hain, meer ban jayen ge hum,

Gar yun hi baRrhta raha shughal-e-mai-kashi,
Ek din is mai-kade ke peer ban jayen ge hum,

Us ne bhi auron ke jaise kiya hum se salook,
Jo yeh kehta tha teri taqdeer ban jayen ge hum..



Apne hunar ki dhaak bithane main dair ki..

Ghazal Shayari

Apne hunar ki dhaak bithane main dair ki,
Jo dekhte rahe woh dikhane main dair ki,

Woh bhi qabooliyat ki ghaRri dhoondta raha,
Maine bhi apne hath uthane main dair ki,

Kis ko khabar hai us ki sehar kis jahan main ho,
Jungle main jis ne aag jalane main dair ki,

Mumkin hai ab ki baar woh bach kar na ja saken,
Choron ne mil kar shor machane main dair ki,

Ik baat thi jo waqt pe main keh nahin saka,
Ik khawb tha jo maine sunane main dair ki,

Tamoor main ne us ko gale se laga liya,
Jis ne bhi mujh se hath milane main dair ki..



Tu ne dekha hai kabhi aik nazar shaam ke baad..

Ghazal Shayari

Tu ne dekha hai kabhi aik nazar shaam ke baad,
Kitne chup chaap se lagte hain shajar shaam ke baad,

Itne chup chaap ke raste bhi rahen la-ilam,
ChoRr jayen ge kisi roz nagar shaam ke baad,

Maine aese hi gunah teri judayi main kiye,
Jaise tufan main koi choRr de ghar shaam ke baad,

Shaam se pehle woh mast apni uRranon main raha,
Jis ke hathon main thay toote huye par sham ke baad,

Raat beeti to gine aabley aur phir socha,
Kaun tha bayes-e-aghaaz-e-safar shaam ke baad,

Tu hai suraj tujhe maloom kahan raat ka dukh,
Tu kisi roz mere ghar main utar shaam ke baad,

Laut aye na kisi roz woh awara mizaaj,
Khol rakhte hain isi aas pe dar shaam ke baad..



Hum hi zarre riswayi ke..

Ghazal Shayari

Hum hi zarre ruswayi se,
Kya shikwa harjayi se,

Ishq main aakhir haar hui,
Lakh chale danayi se,

Girvida karte hain phool,
Rangon aur ranayi se,

Milte hain anmol ratan,
Sagar ki gehrayi se,

Jhoot ke hol main betha hoon,
Darta hoon sachayi se,

Josh ne seekhi hai parwaz,
Sirf teri angRrayi se..



Diya jalane ki zid na kar..

Ghazal Shayari

Tu hawa ke hathon pe chahton ka diya jalane ki zid na kar,
Yeh udaas logon ka sheher hai, yahan muskurane ki zid na kar,

Main hoon doston ka dassa hua, mera gham hai hadh se baRrha hua,
Main shikasta-ghar ki misaal hoon, mere paas aane ki zid na kar,

Main teri ghazal to nahin hoon na, jo har aik lab pe saja rahoon,
Main to aik misra-e-dard hoon, mujhe gungunane ki zid na kar,

Abhi laut aa, abhi waqt hai, abhi jaan baaqi hai jism main,
Tujhe ilm hai meri jaan hai tu, mujhe azmaane ki zid na kar..



Dil se ik yaad bhula di gayi hai..

Ghazal Shayari

Dil se ik yaad bhulaa di gayi hai,
Kisi ghaflat ki sazaa di gayi hai,

Aeb deewar ke hon ge zahir,
Meri tasveer haTtaa di gayi hai,

Ab yahan se nahin ja sakta koi,
Ab yahan shamaa jala di gayi hai,

Ab mohabbat ka sabbab wehshat hai,
Warna hasrat to miTta di gayi hai,

Is liye jamm ke yahan betha hoon,
Mujh ko meri hi jagah di gayi hai..



Yuun bhi bhook miTa sakta hai..

Ghazal Shayari

Yuun bhi bhook miTa sakta hai,
Banda miTi kha sakta hai,

Ik luqme ki ujrat kya hai,
Ik mazdoor bata sakta hai,

Ahista se paon rakhna,
Kamra shor macha sakta hai,

MiTi ki khasslat main kya hai,
Yeh iblees bata sakta hai,

Kitni dair ik bhenss ke aage,
Banda been baja sakta hai,

Jibrael se aage aami,
Ishq musafir ja sakta hai..



Jeene ko kherani paida karta hoon..

Ghazal Shayari

Jeene ko kherani paida karta hoon,
Khamoshi se maani paida karta hoon,

Tum ko kya maloom ke kitni mushkil se,
Thori si aasaani paida karta hoon,

Shaam Dhale main sahil par jata hoon aur,
Maujon main tughyani paida karta hoon,

Aksar shair ko Dhakta hoon main lafzon se,
Kabhi kabhi uryaani paida karta hoon,

Paon banata hoon aur phir main in ke liye,
Raah koi anjaani paida karta hoon..


Advertisements

We update our poetry database on daily basis so keep coming back for more Ghazal Shayari.



love shayari romantic shayari sad shayari nazam shayari