Ghazal Shayari

Ranjish.com has lots of Urdu Ghazal Shayari Poetry. Feel free to add your own Ghazal Shayari Shayari here.

Ghazal Shayari Collection

Ghazal Poetry is a form or poetry which is little longer than other forms of poetry and contains more words.. Urdu Ghazal Shayari and Ghazal Poetry are the keywords this shayari is searched with.Ghazal Poetry is mostly written in 6 to 10 lines.



Hudood-e-sheher-e-talismat se nikal jaye..

Ghazal Shayari

Hudood-e-sheher-e-talismat se nikal jaye,
aseer-e-khaak samawaat se nikal jaye,

maza to phir hai ab yuun ho us kahani main,
charagh se nahin jinn hath se nikal jaye,

main har kisi se mohabbat se milne lagta hoon,
agar yeh aeb meri zaat se nikal jaye,

woh janta hai mere hath main nahin kuch bhi,
use pata hai to phir ghaat se nikal jaye.



Aik shakhss yahan mubtlaa-e-hairat hai.

Ghazal Shayari

Aik shakhss yahan mubtalaa-e-hairat hai,
jo aagahi main hai wo mawrayehairat hai,

suna hai aj bhi woh mujh ko yaad karta hai,
par is khabar main khushi ke bajaye hairat hai,

mere sikhaye bhi shamil hain nuktaa-cheenon main,
baRrh gaye hain mere qadd se saye hairat hai,

Jahan se guzre woh har cheez theher jati hai,
faqat woh laRrki nahin saraye hairat hai,

yahan to koi baseerat-zada nahin milna,
chaar samt ajab se wabayehairat hai,

main un tamam manazir ka hoon bohat mamnoon,
ke jin ke husn ke sadqe baqaye hairat hai,

hawaas-bakhta hoon main sun ke teri batain,
rakhe hai tu bhi mohabbat pe raye, hairat hai,

humen tu itni musafat pe baad bhi na mila,
kisi ko mil gaya bethe bithaye hairat hai..



Yeh kin lamhaat main bethe huye hain..

Ghazal Shayari

yeh kin lamhaat main bethe huye hain,
shikaari ghaat main bethe huye hain,

baRrhaa kar hath us ko chhuu to lain hum,
magar aukaat main bethe huye hain,

sahulat se jo aage baRrh saken ge,
wohi khadshaat main bethe huye hain,

ali ke naam lewaon main bethe,
lage sadaat main bethe huye hain,

yahan par bethna banta nahi hai,
magar jazbaat main bethe huye hain,

mera kya hai chala jaon ga main to,
magar jo sath main bethe huye hain..



Shab-e-firaq ka manzar nahin badalne diya..

Ghazal Shayari

shab-e-firaq ka manzar nahin badalne diya,
koi charagh jalaya na maine jalne diya,

hum is ka radd-e-ammal jante thay pehle se,
sau hum ne gaind zeyada nahin uchalne diya,

daleel us ke dareeche ki paish ki maine,
kisi ko patlee-galee se nahin nikalne diya..



Tere baad koi bhi gham assar nahin kar saka..

Ghazal Shayari

tere baad koi bhi gham assar nahin kar saka,
Koi saaneha meri aankh tar nahin kar saka,

mujhe ilm tha mujhe kam paRre gi yeh roshni,
sau main inhisar charagh par nahin kar saka,

mujhe chaal chalne main dair ho gayi aur main,
koi aik mohra idhar udhar nahin kar saka,

mere aas paas ki muflisi, meri maazrat,
tera intizam main apne ghar nahin kar saka,

mujhe jhoot ke woh jawaaz paish kiye gaye,
kisi baat par main agar magar nahin kar saka..



Hum ne tasveer jo bana li hai..

Ghazal Shayari

Hum ne tasveer jo bana li hai,
Kuch haqeeqat hai kuch khayali hai,

Tum udhar subah ghar se nikle thay,
Aur idhar shaam hone wali hai,

Dekhte dekhte mujhe us ne,
Chaaye t-shirt par giraa li hai,

Dhoondti hain tujhe meri ankhen,
Aur dhaRrkan teri sawali hai..



Yeh weham jaane mere dil se kyun nikal nahin raha.

Ghazal Shayari

yeh weham jaane mere dil se kyun nikal nahin raha,
ke us ka bhi meri tarah jee sambhal nahin raha,

koi warq dikha jo ashq-e-khoon se tarbatar na ho,
koi ghazal dikha jahan woh daagh jal nain raha,

main aik hijr-e-be-muraad jhailta hoon raat din,
jo aese sabr ki tarah hai jis ka phall nahin raha,

tou ab mere tamam ranj mustaqil rahen ge kya,
tou kya tumhari khamoshi ka koi hall nahin raha ?

kaRri musafton ne kis ke paon shall nahin kiye ?
koi dikhao jo bichaRr ke hath mall nahin raha..



Main kahin ja nahin raha lekin..

Ghazal Shayari

main kahin ja nahin raha lekin,
aap kya mere sath ayen ge ?

koi khiRrki khule gi raat gaye,
kayi apni muraad payen ge,

khul ke rone pe ikhteyar nahin,
hum koi jashn kya manayen ge ?

humen apni talash main mat bhej,
khaRri faslen ujaRr ayen ge..



Aap jaison ke liye is main rakha kuch bhi nahin..

Ghazal Shayari

aap jaison ke liye is main rakha kuch bhi nahin,
lekin aesa to na kahiye ke wafa kuch bhi nahin,

aap kahiye to nibhate chale jayen ge magar,
is talluq main aziyat ke siwa kuch bhi nahin,

main kisi tarah bhi samjhota nahin kar sakta,
ya to sab kuch hi mujhe chahiye ya kuch bhi nahin,

ab main kya apni mohabbat ka bharam bhi na rakhoon,
maaan leta hoon ke us shakhss main tha kuch bhi nahin..



Tootne par koi aye to phir aesa toote..

Ghazal Shayari

tootne par koi aye to phir aesa toote,
ke jisse dekh kar har dekhne wala toote,

Tu ise kis ke bharose pe nahin kaaat rahi,
charkh ko dekhne wali tera charkha toote,

apne bikhre huye tukRron ko samaiTTe kab tak,
aik insan ki khatir koi kitna toote,

koi tukRra teri ankhon main na chubh jaye kahin,
door ho ja ke mere khawb ka sheesha toote,

main kisi aur ko sochon to mujhe hosh aye,
main kisi aur ko dekhon to yeh nasha toote,

pas bethe huye yaron ko khabar tak na hui,
hum kisi baat pe is darja anokha toote,

itni jaldi to sambhalne ki tawaqoh na karo,
waqt hi kitna hua hai mera sapna toote,

daad ki bheek na maang ae mere ache shayar,
ja tujhe meri dua hai tera kaasa toote,

warna kab tak liye phirte rahe is ko jawad,
koi surat ho ke umeed se rishta toote..


Advertisements

We update our poetry database on daily basis so keep coming back for more Ghazal Shayari.



love shayari romantic shayari sad shayari nazam shayari