Ghazal Shayari

tootne par koi aye to phir aesa toote,
ke jisse dekh kar har dekhne wala toote,

Tu ise kis ke bharose pe nahin kaaat rahi,
charkh ko dekhne wali tera charkha toote,

apne bikhre huye tukRron ko samaiTTe kab tak,
aik insan ki khatir koi kitna toote,

koi tukRra teri ankhon main na chubh jaye kahin,
door ho ja ke mere khawb ka sheesha toote,

main kisi aur ko sochon to mujhe hosh aye,
main kisi aur ko dekhon to yeh nasha toote,

pas bethe huye yaron ko khabar tak na hui,
hum kisi baat pe is darja anokha toote,

itni jaldi to sambhalne ki tawaqoh na karo,
waqt hi kitna hua hai mera sapna toote,

daad ki bheek na maang ae mere ache shayar,
ja tujhe meri dua hai tera kaasa toote,

warna kab tak liye phirte rahe is ko jawad,
koi surat ho ke umeed se rishta toote..

tum agar seekhna chaho mujhe batlaa dena,
aam sa fun to koi hai nahin tohfa dena,

aik hi shakhss hai jis ko yeh hunar ata hai,
rooth jane par fazaa aur bhi mehkaa dena,

bhaamp lena ke bohat waqt nahin us ke pas,
aur phir us ko kisi behas main uljha dena,

un bazurgon ka yehi kaam hua karta tha,
jahan khoobi nazar ayi use chamka dena,

husn duniya main isi kaam ko bheja gaya hai,
ke jahan aag lagi ho use bhaRrka dena,

dil batata hai mujhe aqal ki baatain kya kya,
banda pooche ke tera hai koi lena dena ?

Aur kuch yaad na rehta tha laRrayi main use,
haan magar mere guzishta ka hawala dena,

us ki fitrat main na tha tarq-e-talluq lekin,
dusre shakhss ko is nehj pe pohancha dena,

Janta tha ke bohat khaak uRraye ga meri,
koi asaan nahin tha use rasta dena,

yeh woh mansab hain jo apnon ko diye jate hain,
yaad kya rakhna aur bhula kya dena,

dil ka samaan koi khaak khareede us se,
yaad hi na rehta ho jise baqaya dena,

kya pata khud se chiRri jang kahan le jaye,
jab bhi yaad aon meri jaan ka sadqa dena,

baat karne se gurezan nazar ate hain lekin,
khatam hai hazrat-e-jawad pe luqma dena..

dil par pyar ki mohar laga kar bheja hai,
dair se hum ne aaj usse ghar bheja hai,

hum bhi gaon main shaam ko betha karte thay,
hum ko bhi halaat ne bahar bheja hai,

warna aik hujoom tha dil darwaze par,
tum ko sab se pehle andar bheja hai,

kal ik dost to dil ka haal sunaya tha,
us ne mujhe tumhara number bheja hai ,

saari raat laga ke us pe nazm likhi,
aur us ne bas acha likha kar bheja hai..

tu agar khush hai mere rone main,
main wahan beth jaaon kone main,

dekhte ho yeh eent ka takiya,
aik arssa laga bhigone main,

jaag kar bhi tumhare khawb,
jaagne main maza na sone main..

tamam khawhishen puri hon, aab-o-dana ho,
ab is main dil nahin lagta naya zamana ho,

kisi ki salgirah ho kisi ki barsi par,
kisi ka noha kisi aur ka tarana ho,

tamam gaon ikatha ho aik station par,
aur aik shakhss udhar sheher se rawana ho,

usi se poocho sharayet ke jis ke daryaa hain,
woh kya kare ke jise kuch na kuch ugana ho,

kisi se milne ki jaldi bhi ho humen zoraiz,
aur aik jalta hua sheher bhi bachana ho..

lipatt ke soch ki neendain haraam karti hai,
tamaam shab teri hasrat kalaam karti hai,

hum hi woh ilm ke roshan charagh hain jin ko,
hawaa bujhati nahi hai salaam karti hai,

kisi bhi taur sikhati nahi hai azaadi,
mere huzoor, mohabbat ghulaam karti hai,

yeh sar ba-sajda kaha naik-dil tawaif ne,
khudaya shukar ke beti bhi kaam karti hai.

tere talash ke maaron ki neend puri ho,
zara to beth ke pairon ki neend puri ho,

jo aik jaage to dono ko iztiraab rahe,
jo aik soye to dono ki neend puri ho,

khuda to chahe ga khawbon main sab rahen masroof,
khuda to chahe ga bandon ki neend puri ho,

usi ki marzi hai kitnon ko chowkidaar rakhe,
usi ki marzi hai kitnon ki neend puri ho,

yeh roti pani ka jhagRra hai aur logon ka,
main chahta hoon ke logon ki neend puri ho,

visal kar ke judai ka naam tak na rahe,
phir itna jagain ke barson ki neend puri ho,

tera bichaRrna ke bas jagne ki doori pe hai,
to kaise khauf ke maaron ki neend puri ho..

yeh dukh nahin ke sheher main mera koi nahin,
yeh dukh ki baat hai ke kisi ka koi nahin,

uss ka bichaRrna le gaya hiss-e-mazaah tak,
hansne ki baat karta hoon hansta koi nahin,

zulm hota dekhne walon ki saff main hain,
afsos is hujoom main andha koi nahin,

lagta hai woh to sheheron ka ho kar hi reh gaya,
halanke janta tha ke hamara koi nahin,

din kya hua ke bhaag paRre daftron ki samt,
zoraiz sair-gahon main hota koi nahin..

tere baghair tere sath aik jaise thay,
ke hijr o vasl ke lamhaat aik jaise thay,

phir aik din woh sahar-khaiz mere pas aya,
wagarna mere bhi din raat aik jaise thay,

bichaRrne wale kisi aur ka kaha mat maan,
ke tere mere khayalaat aik jaise thay,

na chahne pe bhi aik dusre ke ho hi gaye,
dua alag thi magar hath aik jaise thay,

phir us ke baad khabar ayi woh bohat khush hai,
Juda huye thay to halaat aik jaise thay..

Yeh vasl kya ke khuda toor hi jalaa de yaar,
Maza to jab hai ke woh arsh par jagah de yaar,

Main roz khawb main oonchi jagah se girta hoon,
Tu mujh ko choRrne wala hai to bata de yaar,

Yeh hijr-o-vasl ke qisse to sab ne likhe hain,
Tu sher baandh raha hai to kuch naya de yaar,

Tu mere baad unhe phir bula le mehfil main,
Bas aik baar mere samne utha de yaar,

Woh mera ho nahin sakta to ae musawwar sun,
Hamari sath main tasveer hi bana de yaar..