Dard Bhari Shayari

Rafta-rafta woh meri hasti ka samaan ho gaye,
Pehle jaan, phir jaan-e-jaan phir jan-e-janaan ho gaye,

Din-badin barhti gayin is husn ki raanaaiyan,
Pehle gul, phir gulbadan, phir gulbadamaan ho gaye,

Ap to nazdeek se nazdeektar aatay gaye,
Phir dil, phir dilruba, phir dil ke mehmaan ho gaye,

Pyar jab hadh se barrha saray takalluf mitt gaye,
Ap se phir tum huye, phir tuu ka unwaan ho gaye..

Andheron main bhatakna hai pareshani main rehna hai,
Main jugnuu hoon mujhe ik shab ki veerani main rehna hai,

Abhi kuch zabt ka yaara meri ankhon main baaqi hai,
Abhi ashkon ko palkon ki nigehbaani main rehna hai,

Jo manzar rubaru hai dekh luun ik baar jee bhar ke,
Phir is ke baad to aankhon ko hairaani main rehna hai,

Teri wehshat samajhta hoon ae meri aarzuu lekin,
Tujhe kuch din abhi is dil ki veerani main rehna hai,

Tu phir kyun laut kar har baar aa jati hai saahil pr,
Agar in kashtiyon ko umar bhar paani main rehna hai,

Issi umeed pr to kaat leen yeh mushkilen hum ne,
Ab is ke baad to ae ‘shaad’ aasaani main rehna hai..

Aur zikr kya kijiye apne dil ki halat ka,
Kuch bigarrti rehti hai kuch sambhalti rehti hai..

Aaj rukhsat ho geya duniya se ek bimaar-e-gham,
Dard aesa dil main utha jaan le ker hi geya..

Aakhir ko thhak ke beth gayi ik maqaam per,
Kuch dair mere saath chali rahguzar bhi..

Anaaaon, nafraton, khud-gharziyon ke thehre paani me,
Mohabbat gholne waaley barre darvaish hote hain..

Phir uss ke baad zamane ne mujh ko rond dala,
Main gir parra tha kissi aur ko uthaate huye..

Tum na tauba karo jafaaon se,
Hum wafaaon se tauba karte hain..

Kab thehre ga dard aye dil kab raat bassar hogi,
Sunte they woh aayen ge, sunte they sehar hogi..

Dene aaye hain mere dard ki qeemat mujh ko,
Itne hamdard hain najaane kyun log mere..