sitara-war jale phir bujha diye gaye hum

sitara-war jale phir bujha diye gaye hum
phir is ke baad nazar se giraa diye gaye hum

azeez thay humen nau-varidan-e-kucha-e-ishq
so peeche haTte gaye rasta diye gaye hum

shikast o fateh ke sab faisle huye kahin aur
misal-e-maal-e-ghaneemat luTa diye gaye hum

zameen farsh-e-gul-o-lala se sajayi gayi
phir is zameen ki amanat bana diye gaye hum

duayen yaad kara di gayi theen bachpan main
so zakhm khate rahe aur dua diye gaye hum