Kahin akele mei mil kar jhinjorr duun ga ussay..

Kahin akele mei mil kar jhinjorr duun ga ussay,
Jahaan jahaan se woh tuutta hai jorr duun ga ussay,

Mujhe woh chorr geya yeh kamaal hai uss ka,
Iraada main ne kiya tha ke chorr duun ga ussay,

Badan churaa ke woh chaltaa hai mujh se sheesha-badan,
Ussay yeh ddar hai ke main torr phorr duun ga ussay,

Paseenay baant.ta phirta hai har taraf suuraj,
Kabhi jo haath laga to nichorr duun ga ussay,

Maza chakhaa ke hi maana huun main bhi duniya ko,
Samajh rahi thi ke aise hi chorr duun ga ussay..