Bewafaayi karke nikluun ya wafaa kar jaaun ga..

Bewafaayi karke nikluun ya wafaa kar jaaun ga,
Sheher ko har zaaiqe se aashnaa kar jaaun ga,

Tuu bhi dhoonde ga mujhe shoq-e-sazaa me ek din,
Main bhi koii khuubsurat si khataa kar jaaun ga,

Mujh se achaayi bhi na kar meri marzii ke khilaaf,
Warna main bhi haath koi duusra kar jaaun ga,

Mujh me hain gehri udaasi ke jaraasiim iss qadar,
Main tujhe bhii is maraz me mubtalaa kar jaaun ga,

Shor hai iss ghar ke aangan me “zafar” kuch roz aur,
Gumbad -e- dil ko kissi din be-sadaaa kar jaaun ga..