aaghaaz se acha raha anjaam hamara
aaghaaz se acha raha..
aaghaaz se acha raha anjaam hamara
logon ko batata nahi woh naam hamara
phir hum se muhabbat ki ataat nahi hogi
ik baar nikal aye agar kaam hamara
bimaar ko bhi chain se sonay nahi deta
is ishq ko bhaata nahi araam hamara
ik din to koi theek nishane pe lage ga
har teer nahi jaye ga nakaam hamara
yuun bhool gaye pehli si parwaz kabutar
lamhon main pohanch jata he paighaam hamara
shohrat ke liye khud ko giraya nahi taskeen
sagar se kabhi chalka nahi jam hamara
Asad Taskeen, Ghazal Shayari
January 21st, 2022