Adnan Mohsin

Ranjish.com has lots of Urdu Adnan Mohsin Poetry. Feel free to add your own Adnan Mohsin Shayari here.

Adnan Mohsin Collection

Adnan Mohsin is a young Urdu Poet from Lahore, Pakistan. Lets all read ghazals, nazams and shayari by Adnan Mohsin.

Adnan Mohsin Poetry

Kar mere zakham pe ik baar nazar
teri ankhon main shifa hai mere dost

maut bhi jis se rihaa kar na sake
zindagi aesi saza hai mere dost

kya bataon teri khamoshi se
kesa tufaan uTtha hai mere dost

meri ankhon main janaza hai koi
aur ashkon main dua hai mere dost

mere qatbe pe adaa kar dena
aik bossa jo qazaa hai mere dost

teri khatir mere daaman main faqat
sher hai, sher bhi kya hai mere dost

yeh mere zakhmi tabasum ka khumaar
tere lehje ki ataa hai mere dost

tere hone ka gumaan rehta hai
hijr bhi kesa nasha hai mere dost

jis se aasaab chaTtahte hain mere
tu ne woh shor suna hai mere dost

main tujhe bhoolna chahoon bhi to kyun
tu mera samt-numaa hai mere dost

tu bhi ik roz chala jaye ga
umar bhar kon ruka hai mere dost

maine chooma hai tere maathe ko
tu yeh samjha hai ke hawaa hai mere dost

aaj rone ka maza aye ga
aaj tu khul ke hansaa hai mere dost

asmaan jaise zameen se mil jaye
tu humen aese mila hai mere dost

ishq hi mere taaqub main nahin
aur bhi aik balaa hai mere dost

Ttees uTthi hai kahin andar se
zakhm kuch gehraa laga hai mere dost

chand nikla hai na tu aya hai
raat ne shikwa kiya hai mere dost

kum nahin ho rahi bechani meri
maine cigarette bhi piya hai mere dost

phir teri yaad ka nakhun aa kar
mere seene se laga hai mere dost

phir harey ho gaye cHaale dil ke
phir tujhe dekh liya hai mere dost