Ghazal Shayari

Us ne sukuut-e-shab main bhi apna payaam rakh diya,
Hijr ki raat baam pr mah-e-tamaam rakh diya,

Aamad-e-dost ki naveed ku-e-wafaa main aam thi,
Main ne bhi ik charaagh sa dil sar-e-shaam rakh diya,

Shiddat-e-tishnagi main bhi ghairat-e-mai-kashi rahi,
Us ne jo phair li nazar main bhi jaam rakh diya,

Us ne nazar nazar main hi aise bhale sukhan kahe,
Main ne to us ke paaon main sara kalaam rakh diya,

Dekho yeh mere khawab they dekho yeh mere zakham hain,
Main ne to sab hisaab-e-jan bar-sar-e-aam rakh diya,

Ab ke bahaar ne bhi keen aesi sharaarten ke bas,
Kabk-e-dari ki chaal main tera khiraaam rakh diya,

Jo bhi mila usi ka dil halqa ba-gosh-e-yaar tha,
Us ne to saare sheher ko kar ke ghulaam rakh diya,

Aur faraz chahiyen kitni mohabten tujhe,
Maaon ne tere naam pr bachon ka naam rakh diya..

Jab pyaar nahin hai to bhulaa kyun nahin dete,
Khat kis liye rakhhe hai jalaa kyun nahin dete,

Kis vaaste likha hai hatheli pe mera naam,
Main harf-e-ghalat hoon to mittaa kyun nahin dete,

Lillaah, shab-o-roz ki uljhan se nikaalo,
Tum mere nahin ho to bataa kyun nahin dete,

Reh reh ke na tarrpao ae be-dard maseeha,
Hathon se mujhe zehr pilaa kyun nahin dete,

Jab us ki wafaaon pe yaqeen tum ko nahin hai,
Hasrat ko nigaahon se giraa kyun nahin dete..

Barbaad-e-tamanna pe itaab aur zeyada,
Haan meri mohabbat ka jawab aur zeyada,

Royen na abhi ehl-e-nazar haal pe mere,
Hona hai abhi mujh ko kharaab aur zeyada,

Awaara o majnoon hi pe moquuf nahin kuch,
Milne hain abhi mujh ko khitaaab aur zeyada,

Uthenge abhi aur bhi tufaan mere dil se,
Dekhoon ga abhi ishq ke khawb aur zeyada,

Tapke ga lahuu aur mere deeda-e-tar se,
Dharrke ga dil-e-khana-kharaaab aur zeyada,

Hogi meri baaton se unhe aur bhi hairat,
Aayega unhe mujh se hijaab aur zeyada,

Usay mutrib-e-bebaak koi aur bhi naghma,
Ay saaqi-e-fayaaz sharaab aur zeyada..

Daagh duniya ne diye, zakham zamaane se mile,
Hum ko tohfe yeh tumhe dost banaane se mile,

Hum taraste hi taraste hi taraste hi rahe,
Woh falaane se falaane se falaane se mile,

Khud se mil jaate to chahat ka bharam reh jata,
Kya mile aap jo logon ke milaane se mile,

Maaan ki aghosh main kal maut ki aghosh main aaj,
Hum ko duniya main yeh do waqt suhaane se mile,

Kabhi likhvaane gaye khat kabhi parrhvaane gaye,
Hum haseenon se isi heelay bahaane se mile,

Ik neya zakham mila ek neyi umar mili,
Jab kisi sheher main kuch yaar puraane se mile,

Ek hum hi nahin phirte hain liye qisssa-e-gham,
Un ke khamosh labon par bhi fasaane se mile,

Kaise maanen ke unhe bhool geya tu ae kaif,
Un ke khat aaj humen tere sirhaane se mile..

Safar-e-manzil-e-shabb yaad nahin,
Log rukhsat huye kab yaad nahin,

Avvaleen qurb ki sarshaari hain,
Kitne armaan they jo ab yaad nahin,

Dil main har waqt chubhan rehti thi,
Thi mujhe kis ki talabb yaad nahin,

Woh sitaara thi ke shabnam thi ke phool,
Ek surat thi ajab yaad nahin,

Kaisi viraan hai guzar-gaah-e-khayal,
Jab se woh aaariz-o-labb yaad nahin,

Bhoolte jaate hain maazi ke dayaar,
Yaad aaye bhi to sab yaad nahin,

Aisa uljha hoon gham-e-duniya main,
Ek bhi khawab-e-tarb yaad nahin,

Rishta-e-jaan tha kabhi jis ka khayaal,
Us ki surat bhi to ab yaad nahin,

Yeh haqeeqat hai ke ehbaab ko hum,
Yaad hi kab thay jo ab yaad nahin,

Yaad hai sair-e-charaaghan nasir,
Dil ke bujhne ka sabbab yaad nahin..

Uski hassrat hai jise dil se mitaa bhi na sakoon,
Dhoondne us ko chala hoon jise paa bhi na sakoon,

Daal ke khaak mere khoon pe qaatil ne kaha,
Kuch yeh mehndi nahin meri ke chupaa bhi na sakoon,

Zabt kambakht ne yaan aa ke gala ghonta hai,
Ke usay haal sunaaun to sunaa bhi na sakoon,

Naqssh-e-pa dekh to loon laakh karoon ga sajde,
Sar mera arsh nahin hai jo jhukaa bhi na sakoon,

Bewafa likhte hain woh apne qalam se mujh ko,
Yeh woh qismat ka likha hai jo mitta bhi na sakoon,

Is tarah soye hain sar rakh ke mere zaanu par,
Apni soyi hui qismat ko jagaa bhi na sakoon..

Barabar se bach ke guzar jaane wale,
Yeh naaley nahin be-assar jaane wale,

Nahin jaante kuch ke jaana kahan hai,
Chale ja rahe hain magar jaane wale,

Mere dil ki betaabiyan bhi liye ja,
Dabbay-paaon muh phair kar jaane wale,

Tere ik ishaare pe sakit kharre hain,
Nahin keh ke sab se guzar jaane wale,

Mohabbat main hum to jiye hain, jiyen ge,
Woh hon ge koi aur mar jaane wale..

Mohabbat ki aseeri se rehaayi maangte rehna,
Bohat asaan nahin hota, judaayi maangte rehna,

Zara sa ishq kar lena, zara si aankh-bhar lena,
Iwwaz is ke magar saari khudaayi mangte rehna,

Kabhi mehroom hontton par duaa ka harf rakh dena,
Kabhi wehshat main us ki na-rasaayi mangte rehna,

Wafaaon ke tasalssul se mohabbat rooth jati hai,
Kahani main zara si bewafaayi maangte rehna,

Ajab hai wehshat-e-jaan bhi ke aadat ho gayi dil ki,
Sakoot-e-shaam gham se se humnawaayi mangte rehna,

Kabhi bache ke nanhe hath par titlee ke par rakhna,
Kabhi phir us ke rangon se rehaayi maangte rehna..

Bassti tujh bin ujaarr si hai,
Kambakht yeh shab pahaarr si hai,

Shayed ke hui sarayet-e-ishq,
Kuch seenay main cheer-pharr si hai,

Har-chand ke bolte nahin woh,
Baham par chairr-chaarr si hai,

So rehte hain aik sath lekin,
Talvaar ke beech aaarr si hai,

Insha-Allah aaya shayed,
Iss kuchay main bheerr-bhaarr si hai..

Zabt kar ke hansi ko bhool geya,
Main to us zakhm hi ko bhool geya,

Zaat-dar-zaat hamsafar reh kar,
Ajnabi ajnabi ko bhool geya,

Subh tak vajh-e-jaan-kani thi jo baat,
Main usay shaam hi ko bhool geya,

Ehd-e-vabastagi guzaar ke main,
Vajh-e-wabastagi ko bhool geya,

Sab daleelen to mujh ko yaad rahin,
Behss kya thi ussi ko bhool geya main,

Kyun na ho naaz is zehaanat par,
Ek main har kisi ko bhool geya,

Sab se pur-amn waaqiya hai yeh,
Aadmi aadmi ko bhool geya,

Qehqaha maartay hi deewana,
Har gham-e-zindagi ko bhool geya,

Kya qayamat hui agar ik shakhss,
Apni khush-qismati ko bhool geya,

Sab buray mujh ko yaad rehte hain,
Jo bhalaa tha usii ko bhool geya,

Un se vaada to kar liya lekin,
Apni kam-fursati ko bhool geya,

Khawb-ha-khawb jis ko chaha tha,
Rang-ha-rang ussi ko bhool geya,

Bastiyo ab to rasta dedo,
Ab to main us gali ko bhool geya,

Us ne goya mujhi ko yaad rakha,
Main bhi goya usi ko bhool geya,

Yaani tum woh ho waqeyi ? Hadh hai,
Main to sach-much sabhi ko bhool geya,

Ab to har baat yaad rehti hai,
Ghaliban main kisi ko bhool geya,

Us ki khushiyon se jalne wala Jaun,
Apni eeza-dahi ko bhool geya..

Watch Video