Urdu Poets

Khat ke choTte se tarashe main nahin ayen ge,
Gham zeyada hain lifafe main nahin ayen ge,

Hum na majnoon hain, na farhaad ke kuch lagte hain,
Hum kisi dasht tamashe main nahin ayen ge,

Us ki kuch khair khabar ho to batao yaaro,
Hum kisi aur dilaase main nahin ayen ge,

Mukhtasar waqt main yeh baat nahin ho sakti,
Dard itne hain khulaase main nahin ayen ge,

Jis tarah ap ne beemar se rukhsat li hai,
Saaf lagta hai janaaze main nahin ayen ge..

Garche sau baar hijar se jaan guzri hai,
Phir bhi jo dil pe guzari hai, kahan guzri hai,

Ap thehre hain to thehra hai nizam-e-aalam,
Ap guzre hain to ik mauj-e-rawan guzri hai,

Hosh main aye to batlaye tera deewana,
Din guzaara hai kahan, raat kahan guzri hai,

Aese lamhe bhi guzare hain teri furqat main,
Jab teri yaad bhi dil pe giraan guzri hai,

Hashar ke baad bhi deewane tere poochte hain,
Woh qayamat jo guzarni thi kahan guzri hai,

Zindagi Saif ke liye qaafila armaanon ka,
Maut ki raat se benaam-o-nishan guzri hai..

Kya aese kam-sukhann se koi guftgu kare,
Jo mustaqil sakoot se dil ko lahuu kare,

Ab to humen bhi tark-e-marasim ka dukh nahin,
Par dil yeh chahta hai ke aghaaz tu kare,

Tere baghair bhi to ghaneemat hai zindagi,
Khud ko ganwa ke kaun teri justuju kare,

Ab to yeh arzuu hai ke woh zakham khaiye,
Ta-zindagii yeh dil na koi arzuu kare,

Tujh ko bhula ke dil hai woh sharminda-e-nazar,
Ab koi hadsa hi tere rubaru kare,

Chup-chaap apni aag main jalte raho faraz,
Duniya to arz-e-haal se be-abruu kare..

Na jee bhar ke dekha na kuch baat ki,
BaRri aarzu thi mulaqat ki..

BaRre tahammul se rafta rafta nikalna hai,
Bacha hai jo tujh main mera hissa nikalna hai,

Yeh ruuh barson se dafan hai tum madad karo ge ?
Badan ke malbe se is ko zinda nikalna hai,

Nazar main rakhna kahin koi ghamm-shanaas gahak,
Mujhe sukhan bechna hai, kharcha nikalna hai,

Nikaal laya hoon ek pinjre se ik parinda,
Ab is parinde ke dil se pinjra nikalna hai,

Yeh tees barson se kuch baras peeche chal rahi hai,
Mujhe ghaRri ka kharab purza nikalna hai,

Khayal hai khandan ko ittilaa de doon,
Jo katt gaya us shajar ka shajra nikalna hai,

Main aik kirdar se baRra tang hoon qalamkaar,
Mujhe kahani main Ddaal ghussa nikalna hai..

Zindagi kum paRrhe pardesi ka khat hai ibrat,
Yeh kisi tarah paRrha jaye na samjha jaye..

Sar se paa tak woh gulabon ka shajar lagta hai,
Ba-wuzu ho ke bhi chhute huye Ddar lagta hai,

Main tere sath sitaron se guzar sakta hoon,
Kitna asaan mohabbat ka safar lagta hai,

Mujh main rehta hai koi dushman-e-jaani mera,
Khud se tanhai main milte huye Ddar lagta hai,

But bhi rakhe hain namazen bhi adaa hoti hain,
Dil mera dil nahin Allah ka ghar lagta hai,

Zindagi tu ne mujhe qabr se kam di hai zameen,
Paaon phailaaun to deewar main sar lagta hai..

Hum kya kahen ehbaab kya kaar-e-numayaan kar gaye,
BA huye, naukar huye, pension mili phir mar gaye..

Ae shamaa tujh pe yeh raat bhaari hai jis tarah,
Maine tamaam raat guzaari hai iss tarah..

Rasta sochte rehne se kidhar banta hai,
Sar main saudaa ho to deewar main dar banta hai..