Video Shayari

Ranjish.com has lots of Urdu Video Shayari Poetry. Feel free to add your own Video Shayari Shayari here.

Video Shayari Collection

Video Poetry is shayari in video format. Video Shayari is recited by a female or male so that shayari lovers can hear it and watch it being recited. This type of audio shayari which can either be in urdu or in hindi is immensely popular among teenagers who don’t just like reading poetry but prefer listening to poetry in attractive voices.
Video poetry lovers usually like poetry in girls voices so we will try to record our audio and video shayari in female voices. We produce these poetry videos ourself.



Yeh duniya agar mil bhi jaye to kya hai..

Video Shayari

Yeh mehlon, yeh takhton, yeh taajon ki duniya,
Yeh insaan ke dushman samaajon ki duniya,
Yeh daulat key bhookhay rawajon ki duniya,
Yeh duniya agar mil bhi jaaye to kya hai,
Yeh duniya agar mil bhi jaaye to kya hai,

Har ek jism ghayal, har ek rooh pyaasi,
Nigahon mein uljhan, dilon mein udaasi,
Yeh duniya hai ya aalam-e-badhawasi,
Yeh duniya agar mil bhi jaye to kya hai,

Yahaan ik khilona hai insaan ki hasti,
Yeh basti hai murda paraston ki basti,
Yahaan to jeevan se hai maut sasti,
Yeh duniya agar mil bhi jaye to kya hai,

Jawaani bhatakti hai badkaar ban kar,
Jawaan jism sajtey hein bazaar ban kar,
Yahaan pyaar hota hai byopaar ban kar,
Yeh duniya agar mil bhi jaye to kya hai,

Yeh duniya jahaan aadmi kuch nahi hai,
Wafaa kuch nahi, dosti kuch nahi hai,
Yahaan pyaar ki qadar hi kuch nahi hai,
Yeh duniya agar mil bhi jaye to kya hai,

Jala do isey, phoonk daalo yeh duniya,
Mere saamne se hattaa lo ye duniya,
Tumhari hai tum hi sambhalo yeh duniya,
Yeh duniya agar mil bhi jaye to kya hai..

Watch Video



Agar kabhi meri yaad aaye..

Video Shayari

Agar kabhi meri yaad aye,
To chaand raton ki narm dilgeer roshni main,
Kisi sitaare ko dekh lena,
Agar woh nakhl-e-falak se urr kar tumhare qadmon main aa gire to,
Yeh jaan lena woh istaara tha mere dil ka,
Agar na aaye..

Magar yeh mumkin hi kis tarah hai ke tum kisi pr nigaah dalo,
To us ki deewar-e-jaan na tootay,
Woh apni hassti na bhool jaye,
Agar kabhi meri yaad aye,
Gurez karti hawaa ki lehron pe hath rakhna,
Main khushbuon main tumhe miloon ga,
Mujhe gulaabon ki patiyon main talash karna,
Main oass qatron ke aayinon main tumhe miloon ga,
Agar sitaron main, oass qatron main, khushbuon main na pao mujh ko,
To apne qadmon main dekh lena,
Main gard karti masaafton main tumhe miloon ga,

Kahin pe roshan chiraagh dekho to jan lena,
Ke har patangay ke sath main bhi bikhar chuka hoon,
Tum apne hathon se un patangon ki khaak daryaa main daal dena,
Main khaak ban kar samandron main safar karoon ga,
Kisi na dekhe huye jazeere pe ruk ke tum ko sadaayen doon ga,
Samandron ke safar pe niklo to us jazeere pe bhi utarna,
Agar kabhi meri yaad aye…

Watch Video



Kabhi hum khoobsurat thay..

Video Shayari

Kabhi hum khoobsurat thay,
Kitaabon main bassi khushbu ki maanind,
Saans saakin thi,
Bohat se an-kahe lafzon se tasveeren banate they,

Parindon ke paron pr nazam likh kar,
Door ki jheelon main basne wale logon ko sunaate they,
Jo hum se door thay lekin hamare paas rehte thay,
Naye din ki musaafat jab kiran ke sath hamare aangan main utarti thi,
To hum kehte they, ami titliyon ke par kitne khoobusrat hain,
Humen maathay pe bossa do,
Ke hum ko titliyon ke, jugnuon ke des jana hai,
Humen rangon ke jugnu, Roshni ki titliyaan awaz deti hain,
Naye din ki musaafat rang main dabi hui hawaa ke sath khirrki se bulaati hai,
Humen maatthay pe bossa do,
Ke hum ko titliyon ke jugnuon ke des jana hai..

Watch Video



Mujhe dost ban ke daghaa na de..

Video Shayari

Mere hum-nafass mere hum-nawaa, mujhe dost ban ke dagha na de,
Main hoon dard-e-ishq se jaan ba-lab mujhe zindagi ki dua na de,

Main gham-e-jahan se nidhaal hoon ke saraapa huzn-o-malaal hoon,
Jo likhe hain mere naseeb main, woh alam kisi ko khuda na de,

Na yeh zindagi meri zindagi, na yeh dastaan meri daastan,
Main khayal o veham se door hoon, Mujhe aj koi sadaa na de,

Mere ghar se door hain raahaten, mujhe dhoondti hain museebten,
Mujhe khauf yeh ke mera pata koi gardashon ko bataa na de,

Mujhe chorr de mere haal pr, tera kya bharosa ae chaaragar,
Yeh teri nawaazish-e-mukhtasar, mera dard aur barrhaa na de,

Mera azam itna buland hai ke paraaye sholon ka ddar nahin,
Mujhe khauf aatish-e-gul se hai kahin yeh chaman ko jalaa na de,

Dar-e-yaar pe barri dhoom hai, wohi aashiqon ka hujoom hai,
Abhi neend aani hai husn ko, koi shor kar ke jagaa na de,

Mere daagh-e-dil se hai roshni, yehi roshni meri zindagi,
Mujhe dar hai ae mere chaaragar, yeh chiraagh tu hi bhujaa na de,

Woh uthe hain le ke khum-o-subuu, aray ae shakeel kahan hai tu,
Tera jaam lene ko bazm main, koi aur hath barrha na de..

Watch Video



Na aye tujh ko nazar, tu magar udaas na ho..

Video Shayari

Na aye tujh ko nazar‘ tu magar udaas na ho
Talash kar’ woh yahin teray aa’s paas na ho

Mujhay yakeen nahin’ uss ko tera paas na ho
Tera gumaan na ho’ ya tera qayaas na ho

Woh aur kya karay akhir’ agar udaas na ho
Beghair ishq na chain aye’ ishq raas na ho

Yeh kis ko log liye ja rahay hain kaandhon par
Kahin yeh shakhs tumhara wafa shanaas na ho

Bicharnay walon ko ik din khuda milata hai
Tujhay hamari kasam’ iss qadar udaas na ho

Yeh bandagi hai’ k har haal main ho shukar us ka
Hazar kuch ho’ magar koi naaspaas na ho

Woh maajra jo hai majnoon k naam se mashoor
Kahin hamaray fasanay ka iktibas na ho

Zia e ilm o hunar se hai aabro e bashar
Yeh roshni to ho’ ujla agar libas na ho

Maza to jab hai k ho baat baat qand o nabaat
Woh baat zeher hai jis baat main mithaas na ho

Hai aik tanz tanz ka nashtar’ dua e umer e daraz
Uss aik shakhs ko’ jeenay ki jis ko aa’s na ho

Naseer khel nahin hai sha’oor e zaat o sifaat
Khuda shanaas kahan woh’ jo khud shanaas na ho..

Watch Video



Apne sab yaar kaam kar rahe hain..

Video Shayari

Apne sab yaar kaam kar rahe hain,
Aur hum hain ke naam kar rahe hain,

Tegh-baazi ka shauq apni jagah,
Aap to qatl-e-aam kar rahe hain,

Daad-o-tehseen ka yeh shor hai kyun,
Hum to khud se kalaam kar rahe hain,

Hum hain masroof-e-intizaam magar,
Jaane kya intizaam kar rahe hain,

Hai woh bechaargi ka haal ke hum,
Har kisi ko salaam kar rahe hain,

Aik qataala chahiye hum ko,
Hum yeh elaan-e-aam kar rahe hain,

Na uthe aah ka dhuaan bhi ke woh,
Ku-e-dil main khiraam kar rahe hain,

Us ke honton pe rakh ke hont apne,
Baat hi hum tamaam kar rahe hain,

Hum ajab hain ke us ke kuchay main,
Be-sabab dhoom-dhaam kar rahe hain..

اپنے سب یار کام کر رہے ہیں - جون ایلیا

Watch Video



Koi to ho jo meri wehshaton ka saathi ho..

Video Shayari

Deyaar-e-noor main teera-shabon ka saathi ho,
Koi to ho jo meri wehshaton ka saathi ho,

Main us se jhoot bhi boloon to mujh se sach bole,
Mere mizaaj ke sab mausmon ka saathi ho,

Main us ke hath na aaon woh mera ho ke rahe,
Main gir parroon to meri pastiyon ka saathi ho,

Woh mere naam ki nisbat se moatbar thehre,
Gali gali meri ruswaayiyon ka sathi ho,

Kare kalaam woh mujh se to mere mere lehje se,
Main chup rahoon to mere taivron ka saathi ho,

Woh khawb dekhe to dekhe mere hawaale se,
Mere khayaal ke sab manzaron ka saathi ho..

Watch Video



Mohabbat kya ho akhir tum..

Video Shayari

Mohabbat rog hai ya phir haseen raag hai koi,
Kisi jharnay ke paani ka dilkash saaz hai koi,

Mujhe aksar yeh lagta hai mohabbat raaz hai koi,
Samajh se baala ik awaz hai koi,
Phir is raaz se parda uthaane ko,
Sabi ehsas ke dhaaron ko milaya maine,
Aur dheere se mohabbat se bass itna kaha,
Mohabbat kya ho akhir tum,

Mohabbat kya ho akhir tum,
Kisi majnoon ka pagalpan,
Kisi farhaad ka taisha,
Kisi sassi ka sehraa ho,
Kisi punnu ki bechaini,
Kisi sohni ka gharra ho,
Junoon haizi ho tum,
Ya phir junoon haizi ki rahbar ho,
Mohabbat kya ho akhir tum,

Batao na kisi mastaanay ki masti ho,
Kisi sufi ka sajda ho,
Kisi zahid ka taqwa ho,
Kisi bhale ke ghunghruu ho,
Kisi mufti ka fatwa ho,
Koi uljhan ho tum ya koi suljhi hui shay ho,
Mohabbat kya ho akhir tum,

Kisi waris ki heer ho,
Kisi saif ki jheel ho,
Tum kis raste ki rahbar ho,
Be-nishan ho ya phir koi nishan-e-manzil ho,
Mohabbat kya ho akhir tum,

Koi mai-khana ho tum,
Ya kisi mai-khane ka jaam ho,
Koi pathar ki murat ho,
Koi masjid ya mandir ho,
Kisi deewane ka raqs ho,
Ya phir mast dhamaal ho,
Andheri raat main jugnu,
Ya phir subah ka sitaara ho,
Mohabbat kya ho akhir tum,

Kisi ki ankh ka paani ho,
Ya khush-rang kahani ho,
Kisi ki thandi aah ho,
Ya tum koi dilkash hansi ho,
Tapti dhoop main saya,
Ya phir december ki dhoop ho,
Mohabbat ka ho akhir tum,

Bohat socha tab mere dil se sadaa ayi,
Mohabbat dil pe ilhaam ki surat,
Bohat dheere se utarti hai,
Kahin andar panapti hai,
Mohabbat rog hai ya phir haseen raag hai koi,
Kisi jharne ke paani ka dilkash saaz hai koi,
Mohabbat deen hai ya phir tayaag hai koi,
Kisi kache gharre ka raaz hai koi..

Watch Video



Us ke nazdeek gham-e-tark-e-wafa kuch bhi nahin..

Video Shayari

Us ke nazdeek gham-e-tark-e-wafa kuch bhi nahin,
Mutmayin aesa hai woh jese ke hua kuch bhi nahin,

Ab to hathon se lakeeren bhi mitti jaati hain,
Us ko kho kar to mere pas raha kuch bhi nahin,

Kal bicharrna hai to phir ehd-e-wafaa soch ke baandh,
Abhi aghaaz-e-mohabbat hai geya kuch bhi nahin,

Main to is wastay chup hoon ke tamasha na bane,
Tu samajhta hai mujhe tujh se gilaa kuch bhi nahin,

Ae shumaar ankhen isi tarah bichaaye rakhna,
Jaane kis waqt woh aa jaye pata kuch bhi nahin..



Itni muddat baad mile ho..

Video Shayari

Itni muddat baad mile ho,
Kin sochon main gum rehte ho,

Itne haayef kyun rehte ho,
Har aahatt pe ddar jate ho,

Taiz hawa ne mujh se pucha,
Rait pe kya likhte rehte ho,

Kash koi hum se bhi pooche,
Raat gaye tak kyun jaage ho,

Main daryaa se bhi dartaa hoon,
Tum daryaa se bhi gehre ho,

Kon si baat hai tum main aesi,
Itne ache kyun lagte ho,

Peeche murr kar kyun dekha tha,
Pathar ban kar kya takte ho,

Jao jeet ka jashn manao,
Main jhoota hoon tum sache ho,

Apne sheher ke sab logon se,
Meri khaatir kyun larrte ho,

Raat humen kuch yaad nahin tha,
Raat bohat hi yaad aaye ho,

Hum se na poocho hijr ke qisse,
Apni kaho ab tum kaise ho,

Mohsin tum badnaam bohat ho,
Jese ho phir bhi ache ho..


Advertisements

We update our poetry database on daily basis so keep coming back for more Video Shayari.



love shayari romantic shayari sad shayari nazam shayari