Video Shayari

Kaha tha na ke
yoon sote huye mat chorr ke jana
Mujhe beshak jaga dena bata dena

Tumhain rasta badlna hai
Meri had se nikalna hai
To tumhain kis baat ka ddar tha

Main tumhain jane nahi deta
kahin pe qaid kar leta
Arey pagal
mohabbat ki tabiyat me zabrdasti nahi hoti

Jise rasta badlna ho
usy rasta badlne se
Jise had se nikalna ho
usey had se nikalne se
Na koi rok paaya hai
Na koi rok paaye ga

To tumhain kis bat ka ddar tha
Muje beshak jaga dete
Main tumhain dekh hi leta

Tumhain koi dua deta
kam’az kam yoon to na hota
Mere sathi ye haqiqat hai
tumhare bad khone ke liye kuch bhi nahi baki

Magar main khone se darta hon
Main ab sone se darta hon..

Watch Video

Hum hi thehre sazaa-vaar aur khata’aa kuch bhi nahin,
Tu kya samajhta hai tere baad hua kuch bhi nahin,

Yaad jab aayi teri yaad raha kuch bhi nahin,
Dil ne bass aaah bhari aur kaha kuch bhi nahin,

Waqt ki tarah yeh saansain bhi rawaa’n hain ab tak,
Ik bass ashhk tha main aur rukaa kuch bhi nahin,

Hath se hath churra kar gaye jab se tum,
Mene us waqt se in hathon se chhua kuch bhi nahin,

Kash tu mujhe keh de achaanak aa kar,
Ke tere mere jeevan main bacha kuch bhi nahin..

Watch Video

Saarey sheher mein,
Kal eid thi,
Baarish mein bheegi thi,
Ke shayed royi thi,
Bohat udaas eid thi,
Usey bhi shayed kisi ki,
Tamanaa-e-deed thi,
Be’kal si mere ghar ke aas paas,
Pareshaan phir rahi thi,
Dil per parre aahini qufl*,
Dar per dikhayi diye hon ge,
Jo aangan main jhaanka to,
Be’hanaayi hath,
Binaa kisi ke sath,
Na ghar ki sajaawatt,
Na rangeen poshaak*,
Dekh kar sab,
Socha hoga,
Shayed is ghar mein,
Sapne sajaata koi nahin,
Bahar se aata koi nahin,
Aur kisi ki yaad main kho kar,
Ab eid manaata koi nahin,
Ab eid manaata koi nahin…

(aahini qufl:iron lock, lohey ka taala)(poshaak:suit, kaprron ka jorra)

Watch Video

Chunne gaye jab se meri palkon se khwab saare,
Pareshaan hain dil-o-nazar ke mahtaab saare,

Kis qadar an’khille aur be’rang they,
Dekho yeh sard mausmon ke gulaab saare,

Tum to thehre sehel raaston ke musaafir,
Woh raaste bhi to azaab saare,

Fareb-e-nazar to kabhi noor-e-nazar,
Bakhshe hain tu ne hi to khitaab saare,

Tumhen yaad hain chaahton ke puraane sabaq,
Hamari baari badal gaye nisaab saare,

Doori mein haayel yeh pardaa acha tha,
Jo barrha qurb ho gaye hatam hijaab saare,

Zindagi ki uljhan se uljhe hain jab se,
Bikhar gaye hain tamanaaon ke khawb saare,

Jab se mila woh hum se Rubaab,
Aankhon se utar aaye saraab saare..

Watch Video

Havaa zidi bohat hai,
Shaakh per ik phool bhi
rehne nahin deti,

Raaste mein khaak urrati hai,
To us ki dhool tak rehne nahin deti,
Havaa kyun bhool jati hai,
Ke mere rat’jage
Tera asaasa hain,

Hamari jaagti raaton ki saari kirchiyan,
Ankhon mein chubhti hain,
To kya kuch yaad aata hai,

Havaa tujh se jo mumkin ho,
To sadiyon ki thakkan,
Ashkon se dhone se,
Humein khul kar rone de,
Dil-e-be’meher ko chubhte huye,
Khawbon ke pass’manzar mein tu khone de,

Havaa ab humain sone de,
Havaa zidi bohat hai..

Watch Video

Mujhe na saans ati hai,
Na mera damm nikalta hai,
Magar yeh beech ka aalam,
Bohat takleef deta hai,
Mujhe andar nigalta hai,
Na saahil par pattakta hai,
Bikharna yun samandar ka,
Bohat takleef deta hai,
Jo tum bolo bikhar jayen,
Jo tum bolo sanwar jayen,
Magar yun tootna jurrna,
Bohat takleef deta hai..

Watch Video

Kabhi yaad aao to is tarah,
Ke lahuu ki saari tamaztein*,
Tumhe dhoop dhoop samaitt lain,
Tumhe rang rang nikhaar dein,
Tumhe harf harf mein soch lein,
Kabhi yaad ao to is tarah,
Ke dil o nazar main utar sako,
Sar-e-raah guzar jo milo kabhi,
Na theher sako na guzar sako,
Mera dard phir se ghazal bane,
Kabhi gungunaao to is tarah,
Mere zakham phir se gulaab hon,
Kabhi muskurao to is tarah,
Meri dharrknein bhi larazz uthen,
Kabhi chott khao to iss tarah,
Meri dharrknein bhi larazz uthen,
Kabhi chott khao to iss tarah..

Watch Video

Maine dekha tha un dinon mein usey,
Jab woh khilte gulaab jesa tha,
Us ki palkon se neend chanti thi,
Us ka lehja sharaab jesa tha,

Us ki zulfon se bheegti thi ghataa,
Us ka rukh mahtaab jesa tha,
Log parhte they haal-o-khad us ke,
Woh adab ki kitaab jesa tha,

Bolta tha zubaan khushbuu ki,
Log sunte they dharkinon mein usey,
Mene dekha tha un dinon mein usey,

Sari aankhen thi ayiney us ke,
Sarey chehron mein intikhaab tha woh,
Sab se ghul mil kar ajnabi rehna,
Aik darya numaaN saraab tha woh,

Khawb yeh hai ke woh haqeeqat tha,
Yeh haqeeqat hai khawb tha woh,
Dil ki dharti pe asmaan ki tarah,
Suurat-e-saya-e-sahaab tha woh,

Apni neendein bhi us ki nazar hui’n,
Mene paaya tha rat jaggon mein usey,
Mene dekha tha un dinon mein usey,

Jab woh hans hans ke baat karta tha,
Dil ke haimey mein raat karta tha,
Rang parrhte they anchlon mein usey,
Mene dekha tha un dinon mein usey,

Yeh magar dair ki kahani hai,
Yeh magar door ka fasaana hai,
Us ke mere milaap mein haayel,
Ab to sadiyon bhara zamana hai,

Ab to hai haal apna bhi,
Dasht-e-hijraan ki shaam jjesa hai,
Kya khabar woh in dinon kesa hoga,
Mene dekha tha un dinon mein usey..

Watch Video

Maqrooz Ke Bigray Huye Halaat Ki Maanind
Majboor Ke Honton Pe Sawaalaat Ki Maanind

Dil Ka Teri Chaahat Mein Ajab Haal Hua Hai
Sailaab Se Barbaad Makaanaat Ki Maanind

Mein Un Mein Bhatkay Howay Jugnu Ki Tarah Hun
Usss Shakhs Ki Aankhain Hain Kisi Raat Ki Maanind

Dil Roz Sajaata Hun Mein Dulhan Ki Tarah
Gham Roz Chalay Aatay Hain Baaraat Ki Maanind

Ab Ye Bhi Nahi Yaad Ke Kya Naam Tha Os Ka
Jis Shakhs Ko Maanga Tha Manaajaat Ki Maanind

Kis Darja Muqaddas Hai Tere Qurb Ki Khwaahish
Maasoom Se Bachay Ke Khayaalaat Ki Maanind

Uss Shakhs Se Mera Milna Mumkin Hi Nahi
Mein Pyaas Ka Sehra Hun Wo Barsaat Ki Maanind

Samjhao Mohsin Us Ko Ke Ab Reham Kare
Dukh Baant’ta Phirta Hai Woh Soghaat Ki Maanind

Watch Video

Kaho kese guzarti hai,
Tumhari zindagi, paagal,
Suna hai, ab to eid’en bhi,
Woh pehli si nahin karty,
Kisi ke ghar nahin jatey,
Kisi se bhi nahin miltey,
Kisi ki ek nahin suntey,
Kisi se kuch nahin kehtey,

Na koi gift lete ho,
Na koi gift dete ho,
Kabhi khul kar na hanstey ho,
Kabhi khul kar na rotey ho,
Bohat bekal bohat upset,

Bohat bechain hotey ho,
Suna hai chaand raton mein,
Bohat be’mood dikhtey ho,
Woh kaghaz phaarr dete ho,
Kisi ke wastey jin per,
Bohat se sher likhtey ho,

Na jeetey ho na martey ho,
Suno yeh zindagi pagal,
Bassar kis tarah kartey ho,
Kaho, kesi guzarti hai?

Watch Video