Ghazal Shayari

Jo is shor se meer rota rahe ga,
To hamsaya kaahe ko sota rahe ga,

Main woh rone wala jahan se chala hoon,
Jise abr har saal rota rahe ga,

Mujhe kaam rone se aksar hai naseh,
Tu kab tak mere muh ko dhota rahe ga,

Bas ae girya ankhen teri kya nahin,
Kahan tak jahan ko dubota rahe ga,

Mere dil ne woh naala paida kiya hai,
Jaras ke bhi jo hosh khota rahe ga,

Tu yuun gaaliyan ghair ko shauq se de,
Hamen kuch kahe ga to hota rahe ga,

Bas ae meer mizhgan se ponch aansuon ko,
Tu kab tak yeh moti pirota rahe ga..

Jab kisi se koi gilaa rakhna,
Samne apne aayina rakhna,

Yuun ujaalon se waasta rakhna,
Shamaa ke paas hi havaa rakhna,

Ghar ki tameer chahe jesi ho,
Us main rone ki bhi jagah rakhna,

Masjiden hain namaziyon ke liye,
Apne ghar main kahin khuda rakhna,

Milna julna jahan zaroori ho,
Milne julne ka hausla rakhna..

Khatir se ya lehaz se main maan to geya,
Jhooti qasam se aap ka iman to geya,

Dil le ke muft kehte hain kuch kaam ka nahin,
Ulti shikayeten huin ehsaan to geya,

Darta hoon dekh kar dil-e-be-arzu ko main,
Sunsan ghar yeh kyun na ho mehman to geya,

Kya aye rahat aayi jo kunj-e-mazaar main,
Woh valvala woh shauq woh armaan to geya,

Dekha hai but-kade main jo ae shaikh kuch na puch,
Iman ki to yeh hai ke iman to geya,

Ifsha-e-raaz-e-ishq main go zillaten huin,
Lekin usay jata to diya jaan to geya,

Go nama-bar se khush na hua par hazar shukr,
Mujh ko woh mere naam se pehchan to geya,

Bazm-e-aduu main surat-e-parwana dil mera,
Go rashk se jala tere qurban to geya,

Hosh-o-havaas o taab o tavaan daagh ja chuke,
Ab hum bhi jaane wale hain samaan to geya..

Lakh mismaar kiye jayen zamaane wale,
Aa hi jaate hain neya sheher basaane wale,

Us ki zad pr woh kabhi khud bhi to aa sakte hain,
Yeh kahan jante hain aag lagane wale,

Ab to sawan bhi barood barasta hai,
Ab woh mausam nahin barish main nahane wale,

Sar se jata hi nahin wada-e-fardaa ka junoon,
Mar gaye adal ki zanjeer hilaane wale,

Hum na kehte thay tujhe, waqt bohat zalim hai,
Kya huye ab woh tere naaz uthane wale,

Saaye main bethi huyi nassal ko maloom nahin,
Dhoop ki nazar huye pairr lagane wale,

Ghar main deewaren hain aur sehn main ankhen hain saleem,
Itne azaad nahin waada nibhaane wale..

Thukrao ab ke pyar karo main nashe main hoon,
Jo chaho mere yaar karo main nashe main hoon,

Ab bhi dilaa raha hoon yaqeen-e-wafa magar,
Mera na aitbaar karo main nashe main hoon,

Ab tum ko ikhtiyar hai ae ehl-e-karvaan,
Jo raah ikhtiyar karo main nashe main hoon,

Girne do tum mujhe mera saaghar sambhal lo,
Itna to mere yaar karo main nashe main hoon,

Apni jise nahin usay shahid ki kya khabar,
Tum us ka intezar karo main nashe main hoon..

Labb-e-khamosh se ifsha hoga,
Raaz har rang main ruswaa hoga,

Dil ke sehraa main chali sard havaa,
Abr gulzar pe barsa hoga,

Tum nahin the to sar-e-baam-e-khayal,
Yaad ka koi sitara hoga,

Kis tawaqoh pe kisi ko dekhen,
Koi tum se bhi haseen kya hoga,

Zeenat-e-halqa-e-aghosh bano,
Door betho ge to charcha hoga,

Jis bhi fankaar ka shahkar ho tum,
Us ne sadiyon tumhe socha hoga,

Aaj ki raat bhi tanha hi kaTTi,
Aaj ke din bhi andhera hoga,

Kis qadar karb se chaTtki hai kali,
Shaakh se gul koi toota hoga,

Umar bhar roye faqat is din,
Raat bheegi to ujala hoga,

Saari duniya hamen pehchanti hai,
Koi ham se bhi na tanha hoga..

Yeh kesa nasha hai main kis ajab khumar main hoon,
Tu aa ke ja bhi chuka hai main intezar main hoon,

Makaan hai qabar jise log khud banate hain,
Main apne ghar main hoon ya main kisi mazaar main hoon,

Dar-e-faseel khula ya pahaRR sar se haTta,
Main ab giri hui galiyon ke marg-zar main hoon,

Bas itna hosh hai mujh ko ke ajnabi hain sab,
Ruka hua hoon safar main kisi dayaar main hoon,

Main hoon bhi aur nahin bhi ajeeb baat hai yeh,
Yeh kesa jabr hai main kis ke ikhtiyar main hoon,

Munir dekh shajar chaand aur deewaren,
Havaa khizaan ki hai sar par shab-e-bahaar main hoon..

Zindagi yuun huyi bassar tanha,
Qaafila sath aur safar tanha,

Apne saaye se chaunk jaate hain,
Umar guzri hai is qadar tanha,

Raat bhar baaten karte hain taare,
Raat kaate koi kidar tanha,

Doobne wale paar ja utre,
NaqshPaa apne chorr kar tanha,

Din guzarta nahin hai logon main,
Raat hoti nahi bassar tanha,

Hum ne darwaze tak to dekha tha,
Phir na jane gaye kidar tanha..

Hum pr tumhari chaah ka ilzaam hi to hai,
Dushnaam to nahin hai yeh ikraam hi to hai,

Karte hain jis pe taan koi jurm to nahin,
Shauq-e-fazool o ulfat-e-nakaam hi to hai,

Dil muddayi ke harf-e-malamat se shaad hai,
Ae jan-e-jan yeh harf tera naam hi to hai,

Dil naaUmeed to nahin nakaam hi to hai,
Lambi hai gham ki shaam magar shaam hi to hai,

Dast-e-falak main gardish-e-taqdeer to nahin,
Dast-e-falak main gardish-e-ayaam hi to hai,

Akhir to ek roz karegi nazar wafa,
Woh yar-e-khush-khisal sar-e-baam hi to hai,

Bheegi hai raat faiz ghazal ibtidaa karo,
Waqt-e-sarod dard ka hangaam hi to hai..

Rone se jo bhaRraas thi dil ki nikal gayi,
Ansuu bahaye chaar tabiyat sambhal gayi,

Main ne taras taras ke guzari hai sari umar,
Meri na ho gi jaan jo hasrat nikal gayi,

Bechain hoon main jab se nahin dil-lagi kahin,
Woh dard kya geya ke meri dil ki kal gayi,

Kehta hai chaaragar ke na paye ga indimal,
Acha hua ke zakham ki surat badal gayi,

Ae shamaa hum se soz-e-mohabbat ke zabt seekh,
Kambakht ek raat main saari pighal gayi,

Shakh-e-nihal-e-umar hamari na phal saki,
Yeh to hai woh kali jo nikalte hi jal gayi,

Dekha jo us se pyar se aghyar ki tarf,
Shayar qasam khuda ki meri jaan jal gayi..